Soltústik Qazaqstan oblysynda jabaiy janýarlardyń jolǵa shyǵýyna bailanysty birneshe jol-kólik oqiǵasy tirkeldi. Politsiia júrgizýshilerdi ásirese túngi ýaqytta saq bolýǵa shaqyrdy, dep habarlaidy ult.kz.
Óńirde mundai birneshe jol-kólik oqiǵasy tirkelip úlgergen. Cheliabi – Novosibir tasjolynyń 562-shaqyrymynda Toyota Alphard kóligi bulanmen soqtyǵysqan. 57 jastaǵy júrgizýshi zardap shekken joq, alaida janýar ólgen. Kólik mehanikalyq zaqymdalyp, ony evakýatormen alyp ketken.
«Kúz mezgilinde jabaiy janýarlar joldy jii kesip ótedi. Petropavl – Qostanai, Petropavl – Jezqazǵan jáne Cheliabi – Novosibir baǵyttaryndaǵy tasjoldarda janýarlarmen soqtyǵysý qaýpi joǵary. Tamyz aiynyń sońynda osyndai birneshe jol-kólik oqiǵasy tirkeldi. Olardyń barlyǵy qarańǵy ýaqytta, orman alqaptaryna jaqyn jerde bolǵan. Aqqaiyń aýdanynda Hyundai Tucson kóligi qabandy qaǵyp, janýar ólgen. Al Esil aýdanynda Hyundai Staria kóliginiń aldynan kenetten shyqqan elik kólik astynda qalǵan», – delingen habarlamada.
Politsiia júrgizýshilerdi jyldamdyq rejimin saqtaýǵa, qarsy baǵyttaǵy kólikterdiń júrgizýshilerin alystan túsiretin jaryqpen shaǵylystyrmaýǵa jáne qaýipsizdik beldigin taǵýǵa shaqyrdy.
Quqyq qorǵaý organdary ásirese túngi ýaqytta, ormanǵa jaqyn ýchaskelerde jáne burylystarda barynsha saq bolýdy eskertedi.
