Foto: Orda.kz
Túrkistan oblysynda túngi ýaqytta qatygez qylmys jasaldy. Túlkibas aýdanynda belgisiz bireýler bir top jigitke oq atyp, saldarynan 17 jastaǵy Tórehan Nurlybekuly Tóreáli oqiǵa ornynda kóz jumdy, dep habarlaidy Ult.kz Orda.kz saityna silteme jasap.
Qaiǵyly oqiǵa 2 qarasha kúni keshke Túlkibas aýdany, Kókterek aýylynda bolǵan. Kýágerlerdiń aitýynsha, kólikten qarý asynǵan, betperde kigen úsh er adam shyǵyp, jastarǵa qarata oq jaýdyra bastaǵan. Birneshe jigit jasyrynyp úlgergenimen, oq tórt adamǵa tigen.
Túrkistan oblysynyń Politsiia departamenti kúdiktilerdiń jeke basy anyqtalǵanyn habarlady. Qazirgi tańda olardyń bireýi ustalyp, ekinshisin izdestirý jumystary jalǵasyp jatyr.
Sol túni jaralanǵan úsh jigittiń oq aiaqtaryna tigen. Olardyń biri aýrýhanadan shyqqanymen, endi úiden shyǵýǵa qorqatynyn moiyndady.
«Biz jai ǵana turyp sóilesip turǵanbyz. Kólik toqtap, betperde kigen úsheý shyǵyp, ata bastady. Biz jerge jattyq, olar báribir atqylady. Endi búkil aýyl qorqyp otyr. Politsiianyń ózi "kóshege shyqpai turyńyzdar, kenetten qaityp oralýy múmkin" dep eskertti», – deidi oqiǵa kýágerleriniń biri.
Jergilikti turǵyndar shabýyldaýshylar aldyn ala daiyndalǵanyna senimdi. Olardyń aitýynsha, qylmyskerler jaqsy jabdyqtalǵan jáne tez áreket etken. Tipti olar kózdegen adamdarynan jańylysyp, basqa bireýlermen shatastyryp alýy múmkin degen de boljam bar.
Qaza tapqan jigittiń anasy Elmira Aidarálieva ulynyń esh sebepsiz óltirilgenin aitady.
«Meniń balam jai ǵana sol jerde kezdeisoq bolyp qaldy. Ol kóliktiń astyna tyǵylǵan, biraq bireýi ony moinynan súirep shyǵaryp, jerge laqtyryp tastap, júreginen atqan. Esh múdirmesten jasady. Ekinshi balany da óltirmek boldy, biraq oq qisyq ketti. Osydan keiin olar kólikke otyryp, ketip qaldy», – deidi marqumnyń anasy.
Otbasynyń aitýynsha, sol kúni keshke Tórehannyń kózi aýyryp, aǵasymen birge dárihanaǵa barǵan. Ata-anasy eki saǵattan keiin dárihana janynda atys bolǵanyn estigen. Olar aýrýhanaǵa jetkende, bir uly tiri, al ekinshisi jansyz jatqan.
Oqiǵa bolǵan túni jaralanǵandar shabýyldaýshylar qaityp kelýi múmkin dep qorqyp, jedel járdem shaqyrmaǵan. Olar aýrýhanaǵa ózderi jetken.
Eki ai buryn ǵana 17 jasqa tolǵan Tórehan Tóreáli dánekerleýshi mamandyǵyn meńgerip júrgen. Ol sol kúni kózine tamyzatyn dári almaq bolyp syrtqa shyqqan edi. Alaida, qarapaiym kesh osy otbasy úshin orny tolmas qasiretke ainaldy. Jigit týǵan aǵasynyń qolynda jan tapsyrǵan.
