Túrkistan qalasynda zamanaýi úlgidegi sport nysandary salynyp jatyr. Olardyń qurylysy oblys ákimi Ómirzaq Shókeevtiń tikelei baqylaýynda, dep habarlaidy «Ult aqparat» Túrkistan oblysy ákimdiginiń baspasóz qyzmetine silteme jasap.
Buqaralyq sport pen joǵary jetistikter sportyn damytý baǵytynda oblys basshysynyń bastamasymen birneshe jańa sport ortalyqtary boi kótergen.
Sport salasyna úlken kóńil bóletin oblys ákimi qaladaǵy jańa sport nysandardyń qurylys alańdaryn aralady. Jaýapty sala basshylarymen kezdesip, jumystyń sapasyna basa nazar aýdarýdy tapsyrdy.
Túrkistanda salynyp jatqan barlyq ǵimarattar qalanyń kórki ǵana emes, tarihi kelbeti men bolmysyn saqtai otyryp, zamanaýi arhitektýranyń ozyq jetistikterin paidalanýda. Ǵalymdar men kásibi mamandardyń pikiri eskerilip, tarihi kelbetin joǵaltpaýǵa basymdyq berilýde.
Sport – adam ómiriniń ajyramas bólshegi ekenin jii aitatyn óńir basshysynyń tapsyrmasymen Túrkistanda «Muz saraiynyń» qurylysy júrip jatyr. Álemdik standarttarǵa sai muz aidyny 1200 adamǵa eseptelgen. Jańa nysan jyl sońynda ashylady.
Túrkistan qalasynda sondai-aq «Tennis ortalyǵy», Olimpiadalyq rezerv mektebiniń ákimshilik ǵimaraty men jataqhanasy, B.Sattarhanov sport kesheni, «At sporty kesheni» sekildi jańa sport nysandary ashylady.
35 gektar jerde ornalasqan at sporty kesheninde polo-klýb, manej, stendtik atysqa arnalǵan alańqai, sadaq atýǵa arnalǵan alań, kanal arqyly ótetin kópir men atpen serýendeý aimaǵy bolady.
20 gektar jerde ornalasqan «TURAN» fýtbol akademiiasynyń qurylysy qarqyndy. Munda sportshylarǵa Eýropanyń úzdik klýbtaryndaǵydai jaǵdai jasalmaq. Jańa keshende úlken jáne shaǵyn 10 fýtbol alańy bolady. Sondai-aq nysanda doping-baqylaý kabinetteri, 300 oryndy qonaqúi, sportshylarǵa arnalǵan monsha, 3 meiramhana, májilis zaldary bar. Saýyqtyrý ornynda meditsinalyq, massaj kabinetteri men jeke bloktar bar.
Elimizde teńdesi joq eskek esý kanalyna da sý keldi. Oblys ortalyǵyndaǵy sport kesheniniń qurylysy halyqaralyq talaptarǵa sai júrgizilýde. Jalpy aýdany 100 gektarǵa jýyq alańda ornalasqan sý sporty kesheninde uzyndyǵy 2,5 shaqyrymǵa sozylatyn sý arnasy salyndy. Ámbebap oqý jattyǵý bazasynda joǵary deńgeidegi jarystar ótkizilmek. Qurylystyń ekinshi kezeńinde munda olimpiadalyq standartqa sai ortalyqta qonaqúiler, bassein, elling, kanoege arnalǵan pirster, kórermenderge arnalǵan jai, kópirler salynady. Sport kesheninde sapbording, sý shańǵysy, flaibording, veikserfing, kanopolo, dragonbot jáne jaǵajai oiyndar fýtboly, voleibol, gandbol, regbi sekildi sý jáne jaǵajai sportynyń tanymal túrlerinen saiystar ótedi.
