Túrkistan mýzykalyq drama teatrynyń qorjyny taǵy bir tamasha týyndymen tolyqty. 12-13 qarasha kúnderi Túrkistan mýzykalyq drama teatry jas dramatýrg Almas Núsiptiń pesasyna qoiylǵan «Maǵjan» spektakliniń premerasyn kórermenge usyndy.
«Eki kún qatarynan qoiylǵan spektakl talǵamy biik kórermen kóńilinen shyqty. Elimizge tanymal Erkebulan Daiyrov, Zarina Karmen, Ali Marat syndy teatr ártisteri jas Maǵjannyń, ómirge ǵashyq Maǵjannyń, eli úshin basyn qaterge tikken Maǵjannyń jáne birneshe márte genotsidke ushyraǵan qazaq halqynyń aýyr taǵdyryn kórermenge jetkize bildi. Aita keteiik, premeraǵa arnalǵan biletterdiń bári satylyp ketti. Bul – Túrkistannyń rýhani jáne mádeni ortalyqqa ainalyp kele jatqanynyń belgisi. Túrkistandaǵy igi ózgeristerge dańqty akter Tuńǵyshbai Jamanqulov ta toqtalyp, jas teatrdyń eńbegin joǵary baǵalady» deidi Túrkistan oblysy ákimdiginiń baspasóz qyzmeti.
«Maǵjan» spektakli ideiasynyń avtory jáne kórkemdik jetekshisi – Ainur Kópbasarova, qoiýshy rejisseri – Davide Livermore (Italiia) rejisser – Chiara Ocella, stsenograf – Eleonora Peronetti, koordinator – Deidda Petra kompozitory – Hamit Shanǵaliev, baletmeisteri – Madina Mýratpekova, grim boiynsha sýretshi – Adel Nurqasymova.
Ótken jyly ǵana ashylǵan jas teatrdyń akterler quramy da 25 jasqa deiingi jastardan quralǵan. «Maǵjan» pesasyn jazyp teatrǵa usynǵan jas dramatýrg – Almas Núsip. Rolderde oinaityn akterlerdiń deni jastar. Maǵjan Jumabaev ózi jyrlap ótkendei, «Men jastarǵa senemin» ideiasy Túrkistan mýzykalyq drama teatrynyń sahnasynda jalǵasyn taýyp otyr desek artyq aitqandyq emes. Jastar – bolashaqqa bastar naqty isterdiń temirqazyǵy. Jastar qoldaýy – memlekettiń asqaq bedelin aiqyn kórsete alatyn erekshe kúsh.
Maǵjan Jumabaev – alash qozǵalysynyń qairatkeri, uly aqyn, ǵalym, aýdarmashy. Ol aǵartýshylyq, ult-azattyq, demokratiiashyl baǵytty ustanǵan tulǵa. Maǵjan óleńderin áleýmettik máselelerdi kóterýge, halqyn óner-bilimge shaqyrýǵa, mahabbat taqyrybyna arnady Óz poeziiasynyń alǵashqy qadamdarynan bastap aqtyq demi bitkenge deiin Maǵjan Jumabaev ult azattyq taqyrybyn úzbei tolǵady, ony óz poeziiasynyń ózegi etti.
Túrki halyqtarynyń birligi – Maǵjan poeziiasynyń áýelden qalyptasqan altyn arqaýy boldy. Aǵartýshylyq salasyndaǵy ómiri, mahabbaty, ultqa adal qyzmeti, qazaq dalasyn jailaǵan ashtyq(1921-22 jyldar) «Maǵjan» spektakliniń taqyryby. Kórermen spektaklden jas Maǵjannyń, ómirge ǵashyq Maǵjannyń, eliniń aýyr háli úshin sheksiz azap shekken, basyn qaterge tikken Maǵjannyń jáne birneshe márte genotsidke ushyraǵan qazaq halqynyń aýyr taǵdyryn kóredi.
Spektakldiń ǵylymi keńesshisi: QR UǴA Akademigi, tarih ǵylymdarynyń doqtory, alashtanýshy, professor Mambet Qoigeldiev. Rolderde oinaityn ártister: QR Eńbek sińirgen qairatkeri Erkebulan Daiyrov, QR Jastar odaǵy «Serper» syilyǵynyń laýreaty Zarina Karmenova, QR Eńbek sińirgen qairatkeri Qarabalin Saǵyzbai, QR Eńbek sińirgen qairatkeri Álimhan Myrzahan, Áli Marat, Áigerim Qairatqyzy jáne Túrkistan mýzykalyq drama teatrynyń artisteri. Dekoratsiia zamanaýi qurylǵylarmen jabdyqtalǵan, shynaiy. Sahnalyq kiimder, rekvizitter sheber mamandardyń arnaiy daiyndaýymen jasaldy. Spektaklge qazaqtyń qara dombrasynyń únine negizdelgen ekskliýzivti mýzyka jazyldy.
