Túrkistan oblysynyń politseileri qyzmet babynda qaitys bolǵan áriptesterin eske aldy, dep habarlaidy QazAqparat.
Túrkistan oblysy Politsiia departamentiniń qyzmetkerleri el tynyshtyǵy jolynda qurban bolǵan áriptesterin bir minýt únsizdikpen eske alyp, gúl shoqtaryn qoiý rásimin ótkizdi.
«Elimizde oryn alǵan terrorlyq shabýyl, aramyzdan talai asyldarymyzdy julyp áketti. Búginde qara jamylyp otyrǵan azamattardyń qaiǵysyna ortaqtasyp, kóńil aitamyz. Qylmysqa qarsy kúreste únemi aldyńǵy qatarda júrgen, óz ómirin jii qaýip-qaterge tigetin politseilerdiń quqyqtyq tártipti qamtamasyz etýge qosqan úlesi ólsheýsiz. Qyzmettik boryshyn atqarý barysynda qaza tapqan áriptesterimizdi eske alý jáne qurmetteý – bizdiń mindetimiz», – dedi Túrkistan oblysy politsiia departamenti bastyǵynyń orynbasary Baǵlan Halyqov.
Aita keteiik, Túrkistan oblysynda turǵyndardyń qaýipsizdigin qamtamasyz etý maqsatynda 47 blok beket ornatyldy. Onyń ishinde 45-i qala, aýdandardaǵy joldarǵa, ekeýi respýblikalyq mańyzy bar joldarǵa qoiylǵan. Tártip saqshylary kúsheitilgen rejimde qyzmet atqarýda.
Qazirgi kezde óńirdegi jaǵdai qalypty.
