Qazaqstannyń birneshe óńirinde 9 qazanda qolaisyz aýa raiy kútiledi. Shyǵys Qazaqstan oblysynda qatty jaýyn-shashyn boljansa, birqatar aimaqta jel kúsheiip, tuman túsedi. Sonymen qatar elimizdiń birneshe óńirinde joǵary jáne tótenshe órt qaýpi saqtalady, dep habarlaidy ult.kz.
«Qazgidromet» RMK málimetinshe, Shyǵys Qazaqstan oblysynda jańbyr jaýyp, taýly aýdandarda kei ýaqytta qatty jaýyn-shashyn, onyń ishinde jańbyr men qar kútiledi. Oblystyń soltústiginde, shyǵysynda jáne ońtústiginde ońtústik-batystan soǵatyn jeldiń ekpini sekýndyna 25 metrge deiin jetýi múmkin. Óskemende de jeldiń ekpini 15-20 m/s bolady.
Abai oblysynda da ońtústik-batystan jáne batystan soǵatyn jel kúsheiedi. Óńirdiń soltústiginde, shyǵysynda jáne ońtústiginde jel ekpini 25 m/s-qa deiin jetýi yqtimal. Semeide kúndiz jeldiń ekpini 15-20 m/s bolady.
Pavlodar oblysynda kúndiz batystan soǵatyn jeldiń ekpini 23-28 m/s-qa deiin kúsheiedi. Aqmola, Soltústik Qazaqstan, Qostanai jáne Qaraǵandy oblystarynyń jekelegen aýdandarynda túnde jáne tańerteń tuman túsedi. Bul óńirlerde jeldiń ekpini 15-20 m/s-qa deiin jetedi. Soltústik Qazaqstan oblysynyń shyǵysy men ońtústiginde jel ekpini kei ýaqytta 25 m/s bolýy múmkin.
Jetisý oblysynda ońtústik-batystan soǵatyn jeldiń ekpini kúndiz kei ýaqyttarda 23-28 m/s-qa deiin jetedi. Jambyl oblysynyń taýly aýdandarynda tuman kútiledi, al jeldiń ekpini 15-20 m/s bolady. Ulytaý oblysynyń soltústigi men shyǵysynda túnde jáne tańerteń tuman túsip, kúndiz shyǵysynda jel kúsheiedi.
Birqatar óńirde órt qaýpi joǵary
Meteorologter elimizdiń birneshe oblysynda órt qaýpiniń joǵary deńgeii saqtalatynyn eskertti.
Qostanai oblysynyń ońtústiginde, Aqtóbe oblysynyń shyǵysynda, Batys Qazaqstan oblysynyń batysynda, ońtústiginde jáne shyǵysynda joǵary órt qaýpi boljanady. Aqtóbe oblysynyń batysynda, ońtústiginde jáne ortalyǵynda, sondai-aq Ulytaý oblysynyń batysynda, ortalyǵynda jáne ońtústiginde tótenshe órt qaýpi saqtalady.
Atyraý oblysynda joǵary órt qaýpi bolsa, ońtústiginde tótenshe deńgei kútiledi. Mańǵystaý oblysynyń ortalyǵynda joǵary órt qaýpi saqtalady.
Eń uzaq merzimdi eskertý Qyzylorda oblysyna qatysty. Munda 9-11 qazan aralyǵynda tótenshe órt qaýpi saqtalady. Oblystyń soltústigi men ortalyǵynda joǵary órt qaýpi boljanǵan.
Mamandar turǵyndardy aýa raiynyń ózgerýin eskerip, qatty jel kezinde saqtyq sharalaryn ustanýǵa jáne órt qaýipsizdigi talaptaryn saqtaýǵa shaqyrady.
