SIM Nepaldaǵy izdeý-qutqarý jumystary aiaqtalǵanyn, al Tibette izdeý jalǵasyp jatqanyn aitty, dep habarlaidy ult.kz.
Qazaqstan Syrtqy ister ministrliginiń resmi ókili Janbolat Úsenov Nepal men Qytaidyń Tibet avtonomiialyq aýdanynda tabiǵi apat bolǵan aimaqta júrgen Qazaqstan azamattaryn izdeý jumystarynyń barysy týraly málimet taratty. Nepalda izdeý-qutqarý operatsiiasy 5 qazanda aiaqtalsa, Tibette izdeý jumystary áli jalǵasyp jatyr.
Qazaqstan Respýblikasynyń Syrtqy ister ministrligi Nepal men Qytaidyń Tibet avtonomiialyq aýdanyndaǵy tabiǵi apat bolǵan aimaqta júrgen Qazaqstan azamattaryna qatysty jaǵdaidy baqylaýda ustap otyr.
«Nepal tarapynyń málimetinshe, Nepal aýmaǵyndaǵy izdeý-qutqarý operatsiiasy 5 qazanda resmi túrde aiaqtaldy. Qazir zardap shekken aýdandarda qalpyna keltirý jumystary júrgizilip jatyr. Osy jumystar barysynda tabylǵan adam súiekteri men jeke zattar keiinnen sáikestendirý úshin tiisti oryndarǵa berilýde», – delingen habarlamada.
Qytaidyń Tibet avtonomiialyq aýdanyndaǵy eń kóp zardap shekken Girong ýezinde izdeý jumystary jalǵasyp jatyr. Qytai tarapy adam súiekterin sáikestendirýmen jáne genetikalyq saraptamamen qatar ainalysyp jatyr.
Buǵan deiin Qazaqstannan úsh týrist qyzdyń iz-túzsiz joǵalǵany habarlanǵan edi. Olardyń ekeýi Nepalda, bireýi Tibette bolǵan. Nepalda tabiǵi apat bolǵan aimaqta bolýy múmkin dep eseptelgen qazaqstandyq áielderdiń birimen bailanys ornatyldy. Onyń saparyn toqtatqandyǵy anyqtaldy. Qazir ol Qazaqstanda.
«Qazirgi ýaqytta taǵy eki otandasymyzdyń ornalasqan jeri anyqtalǵan joq. Olardyń týystary yqtimal sáikestendirý úshin qajetti rásimderden ótti. Atap aitqanda, Nepal men Qytaidyń quzyrly organdary belgilegen tártipke sáikes DNQ saraptamasyna qajet biologiialyq materialdaryn tapsyrdy», – dep atap ótti ministrlik.
Qazaqstandyq diplomattar iz-túzsiz joǵalǵan azamattardyń otbasylarymen bailanysta bolyp, olarǵa qajetti kómek kórsetip jatyr.
