Túrkistan oblysynda Prezidenttiń «Halyq únine qulaq asatyn memleket» tujyrymdamasyna kóshýdegi mindetterdi júzege asyrý maqsatynda «Azamattardy qabyldaýdyń biryńǵai kúni» uiymdastyryldy, dep habarlaidy "Ult aqparat".
Atalǵan shara aiasynda oblystyq politsiia departamentiniń bastyǵy, politsiia general-maiory Qairat Dálbekov qabyldaýǵa aldyn ala jazylǵan turǵyndarmen «ZOOM» platformasy arqyly tildesti.
Turǵyndardyń máselesin sheshý maqsatynda josparlanǵan sharaǵa departament bastyǵynan bólek orynbasarlary men politsiia basqarma, bólimderiniń basshylary qatysty.
Qabyldaýǵa jazylǵan azamattardyń bir bóligi tikelei efir arqyly aryz-shaǵymyn jetkizse, endi birqatary tergeýshilerdiń tiianaqty jumysyna alǵys aitty.
Arasynda ishki ister organyna qyzmetke ornalasý boiynsha óz saýalyn joldaǵandar da boldy.
Departament bastyǵy azamattardyń máselesine mán berip, tiisti sala basshylaryna tapsyrmalar júktedi. Iaǵni, aldaǵy ýaqytta turǵyndar tarapynan túsken árbir saýal boiynsha júieli jumystar júrgiziletin boldy.
«Politsiia halyqqa qoljetimdi bolýy tiis. Ásirese jurtqa jaqyn bolýda ýchaskelik politseilerge artylar júk az emes. Olar árdaiym óz aýmaǵyndaǵy azamattardyń aryz-shaǵymyna den qoiyp, qylmystardyń aldyn alý jumystaryn júrgizip otyrýy kerek»,-dedi Qairat Dálbekov.
Aita keteiik, jyl basynan beri óńirdiń bas politseii 158 adamdy qabyldaǵan bolatyn. Onyń ishinde 69 turǵynǵa onlain rejimde jaýap berdi.
Olardan túsken suraqtardyń basym bóligi óz merziminde sheshimin tapqan.
