Túrkistan oblysynyń ákimi Darhan Satybaldy «Shardara armsport» sport klýbyna bardy, dep habarlaidy «Ult aqparat» oblys ákimdiginiń baspasóz qyzmetine silteme jasap.
Búginde armrestling sportynan Shardaradan 102 álem chempiony shyǵyp otyr. Shaǵalaly Shardara aýdanyna jumys saparymen barǵan óńir basshysy dańqy asqaqtap turǵan sport klýbynyń saiypqyrandarymen júzdesti. Pikir almasyp, jetistikterin joǵary baǵalady.
Jalpy «Shardara armsport» klýbynda qol kúresi sporty boiynsha 500-ge jýyq sportshy bar. Munda sportshylar 32 jattyqtyrýshynyń qol astynda jattyǵýda.
«Búgin Shardaraǵa jumys saparymda sizdermen arnaiy jolyǵýdy jón kórdim. Sebebi Shardara sportshylary Qazaqstandy ǵana emes, álemdi moiyndatyp júr. Bul rette bapkerlerdiń eńbegin aita ketken jón. Shardaralyq jastardyń sportqa qyzyǵýshylyǵy qýantady. Qazaqstannyń eshbir aýdanynda mundai jetistik joq deýge bolady. Qazirgi tańda qol kúresinen Shardaradan 102 álem chempiony bar. Sport salasyndaǵy jetistikterińiz ben tabystaryńyz arta bersin. Óńirimizde sport nysandary kóbeiip jatyr. Biz sportshylardy qoldaýǵa árqashan daiynbyz», – degen Darhan Satybaldy «Shardara armsport» sport klýbyna demeýshiler ázirlegen avtokólikti tartý etti.
Jýyrda ótken álem chempionatyna komandany bastap barǵan komanda kapitany Maǵjan Shamiev syilyqty qabyldap, óńir sportshylary árdaiym el namysyn qorǵaýǵa daiyn ekenin jetkizdi.
Túrkistan oblysynda gir sporty jáne armrestling federatsiiasyn alǵashqy bolyp qurǵan federatsiia prezidenti Arman Qarsybaevtyń shákirtteri bul kúnderi álemdi moiyndatyp júr. Sport federatsiiasy 2001 jyly qurylǵan. Iaǵni, 21 jyldyń ishinde 278 sportshy Aziia chempiony, 391 sportshy QR-nyń chempiony, 85 sportshy halyqaralyq týrnirlerdiń jeńimpazy atanǵan.
