Túrkistan oblysynda politsiia eki jeńil kóliktiń soqtyǵysýy saldarynan 6 adam qaza tapqan jol-kólik oqiǵasy boiynsha tergeý júrgizip jatyr, dep habarlaidy QazAqparat Túrkistan oblyynyń Politsiia departamenti baspasóz qyzmetine silteme jasap.
Baspasóz qyzmetiniń málimetterine qaraǵanda, 16 qazan kúni saǵat 19:14 shamasynda Shardara aýdandyq politsiia bóliminiń 102 pýltine jol apaty týraly habarlama kelip tústi. Oqiǵa ornyna birden jedel-tergeý toby shyqty. Politseiler oblystyq mańyzy bar Jetisai-Shardara avtojolynyń 172-shaqyrymynda «Opel Vectra» avtokóligi joldyń qarsy betine shyǵyp, «Audi-100» avtokóligimen soqtyǵysqanyn anyqtady.
Jol-kólik oqiǵasy saldarynan oqiǵa ornynda eki jeńil kóliktiń júrgizýshileri men 4 jolaýshy qaza tapty, olardyń arasynda kámeletke tolmaǵandar da bar. 6 jolaýshy túrli dene jaraqattarymen aýdandyq aýrýhanaǵa jetkizildi.
Atalǵan jait QR QK 345-baby 4-bóligi «Eki nemese odan da kóp adamnyń ólimine ákep soqqan Jol júrisi jáne kólik quraldaryn paidalaný qaǵidalaryn buzý» boiynsha Shardara aýdandyq politsiia bólimi sotqa deiingi tergeýdiń biryńǵai tizilimine tirkeldi. Tergeýmen Túrkistan oblysy PD anyqtaýshylary ainalysýda. Birqatar saraptamalar taǵaiyndaldy. Sotqa deiingi tergeý barysynda jol-kólik oqiǵasynyń barlyq mán-jaiy anyqtalatyn bolady.
Osy tusta eskerte ketetin jait, jedel-tergeý toby oqiǵa ornyn muqiiat zerdeleý kezinde, atalmysh avtojolda qandai da bir zań buzýshylyqtar joq ekenin anyqtady. Iaǵni, jol qozǵalysyna qatysýshylar úshin jaqsy kórinetin, júrgizýshilerdi eskertetin jol belgileri ornatylǵan.
Túrkistan oblysynyń politseileri barsha kólik júrgizýshilerine árdaiym jol qozǵalysy men qaýipsizdik erejelerin saqtaý kerektigin eskertedi.
