Túrkistan oblysynyń politseileri Qyzyl kitapqa engen taý arqaryn ustap, soiyp alǵan turǵyndy anyqtady, – dep habarlaidy "Ult aqparat" Polisia.kz saityna silteme jasap.
Ekologiialyq qylmystardyń aldyn alý jónindegi “Brakoner” jedel-profilaktikalyq is-sharasy barysynda Báidibek aýdandyq politsiia bóliminiń qyzmetkerleri jergilikti turǵynnan arqar etin tapty.
Báidibek aýdany Tabiǵatty qorǵaý tobynyń inspektory Almas Serikov kúndelikti jumysyn atqarý kezinde taýly aimaqta atty er adamdy baiqap, ony toqtatyp, ne maqsatpen júrgenin surastyrady. Sondai-aq turǵynnyń ózimen birge alyp kele jatqan qabyna kózi túsip, kúmándanǵan politsei tekserý júrgizedi. Sol kezde qap ishinen belgisiz ańnyń jańa soiylǵan eti tabylyp, tárkilenip alynǵan.
Politseiler er adamnan jaýap alý barysynda, ol qaptaǵy et arqardyń eti ekenin, ony ustaǵan kezin óz uialy telefonyna túsirip alǵanyn aitqan. Mal baǵyp júrgen jigit óziniń itterimen birge arqardy ustap alǵan. Odan keiin janýardy soiyp, qaityp kele jatqanynda politseige ustalǵan.
Qazirgi ýaqytta saraptama taǵaiyndaldy. Bul derek QR QK-niń 339-baby (Ósimdikterdiń nemese janýarlardyń sirek kezdesetin jáne quryp ketý qaýpi tóngen, sondai-aq paidalanýǵa tyiym salynǵan túrlerimen, olardyń bólikterimen nemese derivattarymen zańsyz ainalysý) boiynsha tirkeýge alynyp, sotqa deiingi tergeý amaldary júrgizilip jatyr.
