Túrkistan oblysynda «Samuryq-Qazyna» AQ-nyń qarjylyq qoldaýymen muqtaj jáne kópbalaly otbasylarǵa kásip ashýǵa múmkindik beretin «Tabysty otbasy» jobasy bastaldy. Bul týraly búgin óńirlik kommýnikatsialar qyzmetine ótken brifingte Túrkistan oblysy ákimniń orynbasary Beisenbai Tájibaev málim etti.
Baspasóz máslihatynda «Tabysty otbasy» jobasynyń brend-ambassodory Aijani Nurlanova jobanyń maqsaty men sharttary týraly baiandady. Onyń aitýynsha, bul joba negizinen memlekettiń áleýmettik kómegine iline almaǵan otbasylarǵa arnalady. Ondaǵy maqsat - osyndai otbasylardyń iri kásip ashyp ketpese de, ár otbasy úi jaǵdaiynda isin dóńgeletip, kúndelikti otbasyna tabys ákeletin múmkindik jasaý.
Biylǵy 1 jeltoqsannan bastaý alǵan joba elimizdiń 5 óńirinde, iaǵni Túrkistan, Ulytaý, Abai, Jetisý jáne Aqtóbe oblystarynda pilottyq negizde júzege asyp jatyr. Tańdalǵan bes óńirge barlyǵy 300 grant qarastyrylǵan.
Túrkistan oblysynan ázirge 70 adam irikteledi, bul rette oqytý nysany retinde óńirdegi iri aýdandardyń biri Saryaǵash aýdany tańdalǵan. Qatysýshylarǵa Qor tarapynan qural-jabdyq negizinde grant beriledi, iaǵni grant aqshalai berilmeidi. Granttar negizinen áleýmettik jaǵdaiy tómen otbasylarǵa beriledi.
«Jobanyń basty ereksheligi – bes baǵytta sheberlik-synyptary ótkiziledi. Atap aitqanda sulýlyq salasy, áleýmettik jelilerdi súiemeldeý, tiginshi, avtodánekerleýshi jáne konditer. Qatysýshylardyń qalaýy boiynsha baǵyt tańdalady. Olar eki apta boiy ózderi qalaǵan kásiptiń túri úirenip alýyna múmkindik bolady, jańa daǵdylarǵa úirenip, tájiribelik treningterden ótedi. «Tabysty otbasy» jobasyna kópbalaly jáne az qamtylǵan, tolyq emes otbasylardyń músheleri, sondai-aq, erekshe qajettilikteri bar balalardy tárbielep otyrǵan jáne tabysy tómen otbasylardan shyqqan jastar qatysady. Túrkistan oblysy – qarqyndy damyp kele jatqan óńirlerdiń biri. Biz óńirdiń muqtaj otbasylaryn «Tabysty otbasy» jobasyna qatysýǵa shaqyramyz», – dedi Aijani Adaiqyzy.
Brifingte sóz alǵan Túrkistan oblysy ákimniń orynbasary Beisenbai Tájibaev bul joba turǵyndardyń óz isin ashyp, qarjylyq jaǵdaiyn nyǵaitýǵa jáne jalpy óńirimizdiń ekonomikasyna oń yqpal etetinin atap ótti.
«Túrkistan óńiriniń ónerkásiptik áleýeti joǵary. Sonymen birge týristik infraqurylym, tarihi-mádeni mura túrindegi artyqshylyqtary az emes, eń bastysy, aimaqtyń eńbekqor halqy bar. Eldegi halyq eń tyǵyz ornalasqan óńirde azamattardyń básekege qabilettiligin, adami kapitaldy, iaǵni quzyrettilikti damytý mańyzdy. Bul basymdyqtar týraly Memleket basshysy Qasym-Jomart Toqaev jii aityp keledi. Sondyqtan halyqtyń osal toptarynan shyqqan azamattarǵa óz isin ashýǵa jáne ál-aýqatyn jaqsartýǵa kómektesetin «Tabysty otbasy» qaiyrymdylyq jobasyn qyzý qoldaimyz ári osy mańyzdy bastamany keńeitý úshin qoldaý kórsetýge daiynbyz», – dedi Beisenbai Dáýletuly.
Aita ketsek, «Tabysty otbasy» jobasyn qoldaýǵa «Samruk-kazyna Trust» qory 200 mln teńgege jýyq qarjy bólgen. Atalǵan qaiyrymdylyq jobasyn iske asyrý kezeńderi týraly tolyq aqparatty @tabysty.otbasy jobasynyń instagram-paraqshasynan alýǵa bolady.Bailanys tel: +7 701 558 0856.
