Búgin Qazaqstan Respýblikasynyń Memlekettik keńesshisi Erlan Qarinniń tóraǵalyǵymen Memlekettik rámizder men vedomstvolyq jáne olarǵa teńestirilgen ózge de nagradalar geraldikasy máseleleri jónindegi respýblikalyq komissiianyń otyrysy ótti. Jiynda úsh másele talqylandy.
Birinshi másele boiynsha QR Mádeniet jáne sport ministri Dáýren Abaev baiandama jasady. Ol Memlekettik rámizderdiń 30 jyldyǵynyń qorytyndysy jáne vedomstvolyq nagradalar jáne geraldikalyq belgiler máseleleri boiynsha normativtik-quqyqtyq aktilerdi jetildirý jónindegi usynystar týraly aitty. Kún tártibindegi ekinshi másele boiynsha Qazaqstan respýblikasy Sybailas jemqorlyqqa qarsy is-qimyl agenttiginiń memlekettik rámizderdi nasihattaý men qoldaný salasyndaǵy jumystar saralandy.
Komissiia otyrysy kún tártibiniń úshinshi máselesi boiynsha Almaty, Pavlodar, Túrkistan oblysy ákimdikteriniń memlekettik rámizderdi paidalaný, qoldaný jáne nasihattaý jónindegi tájiribeleri tyńdaldy. Túrkistan oblysynyń ákimi Darhan Satybaldy oblysta osy baǵytta atqarylǵan jumystarǵa toqtaldy.
«Ózderińizge belgili, bul jyl Qazaqstan Respýblikasynyń Memlekettik Rámizderiniń 30 jyldyǵyn merekeleýmen erekshe. Atalǵan mereke sheńberinde oblysta arnaiy ázirlengen is-sharalar josparyna sáikes tiisti jumystar júrgizilýde. 30 jyldyq aiasynda Ordabasy aýdanynda «Rámizder alańy» ashylyp, Kentaý qalasy men Tólebi, Qazyǵurt aýdandarynda týtuǵyr ornatyldy. Oblystaǵy barlyq alańdar men saiabaqtarda qalyń jurtshylyqtyń qatysýymen Rámizder kúnin atap ótý, patriottyq is-sharalar ótkizý, memlekettik qyzmetkerler men áskeri qyzmetshilerdiń ant qabyldaýy jyl saiynǵy úrdis retinde qalyptasqan», – dedi Darhan Satybaldy.
Túrkistan óńirinde Memlekettik Rámizderdiń 30 jyldyǵy merekesin nasihattaý maqsatynda oblystaǵy 17 aýdan, qaladaǵy 244 konstrýktsiiada (bilbord – 225, banner – 7, led-ekran – 12) ideologiialyq materialdar ornalastyrylǵan. Oblystyq, aýdandyq jáne qalalyq deńgeide patriottyq is-sharalar uiymdastyrylǵan.
25 mamyr – 6 maýsym aralyǵynda oblysta memlekettik rámizderdiń qoldanylýy men ornalastyrylýy boiynsha monitoring jumystary júrgizildi. Aýdan, qalalardaǵy 300 mekeme zerdelenip, anyqtalǵan kemshilikter joiylyp, ádistemelik kómek kórsetilgen.
