Sýret: Stan.kz
Túrkistan oblysynyń Sozaq aýdany, Sholaqqorǵan aýylynda turǵyndardyń 555 maly joǵalyp, úsh aidan beri taba almai júr, dep habarlaidy "Ult aqparat" Stan.kz aqparattyq agenttigine silteme jasap.
Osylai dep jylarman bolǵan buqara daýdyń bári shopan óliminen keiin bastalǵanyn aitady. Byltyr 11 qarashada aýyl irgesindegi qoradan qoishy Ǵalymjan Ózbekov óli kúiinde tabylǵan. Janazaǵa jinalǵan jurtqa onyń aǵasy bir kúnnen soń barlyq maldy úlestirem dep sóz bergen deidi. Alaida sol túni maldyń úlestirilip jatqanyn estigen jurt dereý shopan denesi tabylǵan qoraǵa barypty. Biraq ol jerden birde-bir mal tappaǵanyn aitady.
Jurttyń kúdiginshe, sheneýnikter maldy bólisip alǵan bolýy múmkin.
“Biz janazasyn kútip otyrǵanda bir kisiler janazasy shyqpai turyp, túnde urlaǵan ǵoi. Barsa jurttyń báriniń maly joq. 32 adamnyń maly joq bolyp tur ǵoi eseptegende. Sheneýnikter bólinip, aitpai otyr ǵoi. Bireý men satyp jiberdim deidi, bireý alǵan joqpyn deidi. Júzdesý boldy. Bári alańsyz otyr. Qara halyq jaǵdaiy joq, 5-6 malymen otyrǵan, zeinettegi kisiler shyryldap jatyr. Biraq sheneýnikter tym-tyrys otyr. Bizge jany ashyǵan bir adamdy kórmedik", – deidi 10 malynan aiyrylǵan Kúlánda Nadirova.
Turǵyndar sózinshe, munsha maldy eki adam bólip aidap áketken. Onyń biri Sholaqqorǵan aýylynyń burynǵy politsiia bóliminiń bastyǵy deidi. Osylai dep topshalaǵan buqara politsiiaǵa aryz jazǵaly 3 ai ótkenin aitady. Sodan beri birde-bir kúdikti ustalmai, tergeý júrgizilmepti.
"Bular bizge tolyqqandy jaýap aityp jatqan joq. Qoishylaryńyz ólip qalǵan. Ólip qalǵan adamnan ne suraimyz deidi. Negizinde qorada mal turady. Maldy Júnishan men Qydyrbai degen kisiler bólip alady. Buryn osy RÝVD-nyń basshysy bolǵan Álimbekov Júnishan degen azamat. Úiine kelsek, qarańǵy bolyp ketedi. Erteń azanda kelińizder deidi. Azanda barsaq, ol kisi biryńǵai kók syrǵa taǵyp tastaǵan. Ne syrǵa qandai ekenin bilmedik", – deidi Sholaqqorǵan aýylynyń turǵyny Asqar Esjanov.
Aýyldas qorasyndaǵy malymyzdy tanydyq deidi keibiri. Biraq oǵan eshqandai dálel joq eken. Sebebi turǵyndar shopanmen kelisimshartqa otyrmaǵan. Bar kinámiz sol degen veterinar tirkeýindegi maldyń da aiaq asty joǵalyp ketkenine ań-tań.
"Aǵasy aitty: "Maldy erteń janaza ótkennen keiin ózim bólip berem" dedi. Oǵan jetkizbei bólinip ketken. Úshke bólinip ketken negizi mal". Bireýi jańaǵy Qydyrbai degen. Men Qydyrbai degenniń úiine bardym. Úsh bas malymdy sol jerden tanyp aldym. Men siiaqty qansha adam tanydy. Bárimizdikin bermedi. RÝVD-dan kezekshi shaqyrdyq. 5-6 politsiia keldi. Olar alyp bere almady. Sóitsek maldyń bárin satyp jiberipti sol eki ortada", – deidi Sholaqqorǵan aýylynyń turǵyny Dosaly Omarov.
Al maldy aidap alyp ketti degen Sholaqqorǵan aýylynyń politsiia bóliminiń burynǵy bastyǵy bolsa óz malymnan da airylyp qaldym dep otyr.
“Men maldy aidatyp jiberdim de qaityp kettim. Sodan halyq qýyp baryp, kelesi qoraǵa jaqyndaǵanda toqtatyp ustap alypty. Jaraidy, aýysyp ketken shyǵar dep oiladyq. Azanda baryp, óz maldaryńyzdy tanyp alar dep qoraǵa apardyq. Ertesine biz kútkennen kóp halyq baryp, bizdiń 170 qoidy túgel áketip qaldy. Sosyn sadaqa dedim. Ishinde 40 qoi meniki”, – deidi Sholaqqorǵan aýylynyń politsiia bóliminiń burynǵy bastyǵy.
Al Túrkistan oblysynyń politsiia departamenti bolsa bylai dep jaýap berdi.
“Sozaq aýdany turǵyndarynyń aryzyna sáikes aýyzsha ózara ýádelesip mal baǵýmen ainalysqan shopannyń múlikti iemdený faktisi boiynsha sotqa deiingi tergeý jalǵasyp jatyr. Qazir tergeý-jedel toby qajet is-sharalardyń barlyǵyn júrgizip jatyr. Olardyń nátijeleri boiynsha zańdy protsestik sheshim qabyldanady” deidi.
Aita ketý kerek, Sholaqqorǵanda qoishy óliminen keiin 32 otbasynyń 555 maly joǵalǵan. Shyǵynǵa ushyraǵannyń eń kóbi 80 bas malynan airylyp, júrek talmasymen aýrýhanaǵa túsipti. Osylai degen buqara maldyń qoishy óliminen keiin joǵalǵanyna da kúdikpen qaraidy.
