Túrkistan oblysynyń politseileri qarý qoldanyp, buzaqylyq jasaǵan kúdiktilerdi ustady, dep habarlaidy "Ult aqparat".
Qazyǵurt APB kezekshi bólimine ýchaskelik inspektorlardan bos jaiylymda bolǵan kókpardy toqtatý kezinde belgisiz bireýlerdiń qarý qoldanǵany týraly habarlama kelip tústi.
Atalǵan jaitty Qazyǵurt politseileri tirkep, jedel-izdestirý sharalaryna kiristi.
Jedel júrgizilgen arnaiy operatsiia nátijesinde Túrkistan oblysy PD kriminaldyq politsiia basqarmasynyń qyzmetkerleri Túrkistan oblysy UQKD jáne QR Ulttyq ulanynyń «Búrkit» arnaiy jasaǵymen birlesip, Qazyǵurt kenti kósheleriniń birinde «VAZ» markaly avtokólikti toqtatyp, 4 kúdiktini ustady.
Ustalǵan Qazyǵurt aýdanynyń 4 jas turǵyny politsiia bólimine jetkizildi.
Kúdiktilerdi tintý kezinde politseiler sómkeni taýyp alyp, odan zattai dálel retinde 16 kalibrli sholaq myltyq pen oq-dárilerdi tárkiledi.
Jedel ýákilder kúdiktilerdiń úiin odan ári tintý kezinde qosymsha 16 kalibrli ańshylyq myltyq pen eki travmatikalyq tapanshany tapty.
Qazirgi ýaqytta atalǵan jait boiynsha QR QK 293 jáne 287 baptary boiynsha sotqa deiingi tergeý amaldary júrgizilýde.
Jastar qamaýǵa alyndy.
Politsiia qyzmetkerleri kúdiktilerdiń basqa da qylmystarǵa qatysy bar-joǵyn tekserip, qarýdyń qaidan alynǵanyn anyqtap jatyr.
