Túrkistan oblysynda turǵyndardy 1,5 milliardqa jýyq teńgege shyǵyndandyrǵan «Indigo-24 Evolution» qarjy piramidasynynyń 12 uiymdastyrýshysy ustalyp, qamaýǵa alyndy. Bul týraly Túrkistan oblystyq Politsiia departamentiniń baspasóz qyzmeti málim etti.
Baspasóz qyzmetiniń habarlaýynsha, biylǵy jazda jedel-izdestirý is-sharalary barysynda Jetisai aýdandyq politsiia bóliminiń qyzmetkerleri Jetisai qalasyndaǵy «Indigo-24 Evolution» qarjy piramidasynyń qyzmetin toqtatqan bolatyn.
Bul jait QR QK-niń 217-baby 3-bóligi (Qarjylyq (investitsiialyq) piramidany qurý jáne oǵan basshylyq etý) boiynsha tirkeldi. Bir ai ótkennen soń jábirlenýshiler sany 300-den asty.
Osydan soń politsiia qyzmetkerleri osy iske qatysy bar basqa da kúdiktilerdi ustaý úshin, qajetti sharalardy qolǵa aldy. Kúdiktilerdiń túr-tulǵasyn anyqtap, izderine tústi. Jetisai aýdandyq politsiia bólimine Shymkent qalasynan qarjy piramidasyn uiymdastyrdy degen kúdikpen Jetisai aýdanynyń turǵyny, qarjy piramidasynyń direktory jetkizildi. Sondai-aq onyń eki sybailasy, Maqtaaral aýdanynyń turǵyndary da ustaldy.
Tergeý barysynda keńsege tintý júrgizilip, qujattar, jabdyqtar, kompiýterler jáne basqa da aiǵaqty zattar tárkilendi. Atqarylǵan jumystardyń nátijesinde alǵashynda 5 kúdikti, keiinnen 7 kúdikti ustaldy. Olar Jetisai, Shardara, Maqtaaral, Saryaǵash aýdandary turǵyndarynyń kópshiligin aldap, alǵan aqshalaryn qaitarmaǵan.
Búgingi tańda Túrkistan oblysy Politsiia departamentiniń bilikti degen tergeýshilerinen tergeý toby qurylyp, sotqa deiingi tergep-tekserý jumystary júrgizilýde.
Túrkistan oblysy Politsiia departamenti Tergeý basqarmasynyń bastyǵy, politsiia polkovnigi Nurmahan Jalǵasovtyń aitýynsha, «Indigo-24 Evolution» qarjy piramidasynyń negizi 2015 jyly Almaty qalasynda qalanǵan.
Onyń uiymdastyrýshysy retinde týys kúdiktiler ustaldy. Olardyń Túrkistan oblysynda birneshe turǵyndy direktor retinde taǵaiyndap, oblys turǵyndarynan 1 million teńgeden aqshalaryn alyp, eselep qaitaramyz degen qurǵaq ýádemen óz alaiaqtyq áreketterin iske asyrǵan. Búgingi tańda jábirlenýshiler sany 1500-den asty. Olardyń barlyǵynyń aryzdary zańdy túrde tirkelgen. Ustalǵan 12 kúdikti de sottyń sanktsiiasymen qamaýǵa alyndy. Búgingi tańǵa deiingi belgili bolǵan shyǵyn kólemi 1 milliardtan astam teńgeni quraidy. Sonymen qatar aryzdanýshylar men kúdiktiler sany artýy, soǵan sáikes shyǵyn kólemi de ósýi múmkin», - deidi polkovnik N.Jalǵasov.
«Belgili bolǵanyndai, salymshylardyń basym bóligi kúdiktilerdiń sózine senip, aldanyp, salymdy nesie arqyly salǵandar. Qazirgi ýaqytqa deiin anyqtalǵan salymshylar salǵan qarjy kólemi 1 million teńgeden 10 million teńgege deiin jetedi»,-delingen Politsiia departamentiniń baspasóz qyzmeti taratqan aqparatta.
