Túrkistan oblysynda kúdikti er adam áielin kámeletke tolmaǵan balalarynyń kózinshe óltirgen. Qazir balalarǵa psihologiialyq kómek kórsetilýde, dep habarlaidy QazAqparat.
Oblystyq PD baspasóz qyzmetiniń málimetinshe, qylmystyq oqiǵa 29 sáýir kúni túngi saǵat 02:45 shamasynda bolǵan. Oqiǵa ornyna jetken politseiler otbasylyq janjal kezinde áiel adam kúieýiniń salǵan dene jaraqattarynan qaitys bolǵanyn anyqtaǵan.
«Atalǵan jait Ordabasy aýdandyq PB-de QR QK 99-baby 1-bóligi «Kisi óltirý» boiynsha tirkeldi. Alynǵan zattai dáleldemeler saraptamaǵa joldandy. Kúdikti óziniń áreketin moiyndap, ókinishin bildirýde. Qazirgi tańda sotqa deiingi tergep-tekserý amaldary júrgizilýde. Tergeý barysynda bolǵan oqiǵanyń barlyq mán-jaiy anyqtalatyn bolady. Kúdikti er azamat qamaýǵa alynǵan» delingen habarlamada.
Sonymen qatar kúdikti dep tanylǵan Ordabasy aýdanynyń turǵyny politsiia bóliminde eshqandai profilaktikalyq esepte turmaǵany belgili boldy. Osy kúnge deiin kórshilerden nemese týystarynan qandai da bir otbasylyq janjal týraly aryz-shaǵym túspegen. Ákimdik qyzmetkerleri men politsiia bóliminiń basshylyǵy jábirlenýshiniń týystarymen kezdesip, túsindirý jumystaryn júrgizgen. Erli-zaiyptylardyń ata-analary kámeletke tolmaǵan tórt balany óz qamqorlyqtaryna alatynyn aityp otyr. Politsiia men ákimdik tarapynan otbasyna barlyq qajetti kómek kórsetý sharalary qatań baqylaýǵa alyndy.
