Túrkistan oblysynyń ákimi Darhan Satybaldynyń tóraǵalyǵymen óńirde energetika salasyn damytý, tarifterdi qadaǵalaý, osy saladaǵy infraqurylymdy jaqsartý máseleleri talqylandy, dep habarlaidy «Ult aqparat» oblys ákimdiginiń baspasóz qyzmetine silteme jasap.
Májiliske jaýapty basqarma basshylary, «Ońtústik Jaryq Tranzit» JShS-niń bas direktory Mýrat Ibragimov, «Energopotok» JShS-niń bas direktory Aigerim Kýshkýmbaeva, «Qazaqstannyń kommýnaldyq júieleri» JShS-niń bas direktory Nabi Aitjanov jáne ózge de azamattar qatysty. Oblys ákimi investorlarǵa qolaily jaǵdai jasaý baǵytynda qýat kózderin arttyrý máselesin kóterdi.
«Túrkistan oblysynyń turǵyndary negizinen aýyldy eldi mekenderde turady. Olardy sapaly infraqurylym, elektr qýatymen qamtý – mańyzdy mindet. Bul baǵyttaǵy jumystar jalǵasady. Sonymen birge erkin ekonomikalyq jáne indýstrialdy aimaqtarda qýaty joǵary ári baǵasy qoljetimdi elektrmen qamtýymyz kerek. Tarifter máselesi de jaýapty mekeme arqyly turaqty zerdelenedi», – dedi Darhan Satybaldy.
Túrkistan oblystyq energetika jáne turǵyn úi kommýnaldyq sharýashylyq basqarmasynyń habarlaýynsha, óńirde energetika salasynda aýqymdy jumystar atqarylǵan. Oblystaǵy 831 eldi mekenniń 815-i ortalyqtandyrylǵan elektr jelisine qosylǵan, qalǵan 16 eldi meken derbes elektr qondyrǵydan elektr qýatyn paidalanýda. Biyl elektrmen qamtamasyz etý nysandarynyń qurylysyna 13,1 mlrd. teńge qaralyp, 40 nysannyń qurylysy júrip jatyr. Onyń 8-iniń qurylysy biyl aiaqtalyp paidalanýǵa beriledi. Al qalǵan 32 nysannyń qurylysy 2023 jylǵa ótpeli.
2024-2025 jyldary Túrkistan qalasynda «Saýran», «Nurtas» qosalqy stantsiialarynyń jáne «Ortalyq» qosalqy stantsiiasynan halyqaralyq áýejaiǵa deiingi elektr jelileriniń qurylysyn júrgizý josparlanyp otyr.
Májiliste Tabiǵi monopoliialardy retteý komitetiniń Túrkistan oblysy boiynsha departamentiniń basshysy Qanat Oralov elektrge jaýapty kompaniianyń tarifteri zań aiasynda qadaǵalaýǵa alynǵanyn málimdep, osy baǵyttaǵy jumystardy baiandady.
