Túrkistan oblysynda qatty boran saldarynan Túrkistan qalasy men 8 aýdanda elektr jelileri úzilip, jaryq sónip qaldy. Qazir 44 eldi meken turǵyndary jaryqsyz otyr, dep habarlaidy QazAqparat.
Qarly boran saldarynan búgin Mashat taý shatqalynan Jambyl oblysyna deiingi jáne Báidibek pen Sozaq aýdandary arasyndaǵy jol qozǵalysy toqtatyldy. Sondai-aq Sholaqqorǵannan Ashysaiǵa deiingi joldar jabyldy. Óńirde Túrkistan qalasy men 8 aýdandaǵy 44 eldi mekende elektr jelileri úzilip, jaryq sónip qaldy. Qazyǵurt asýynda da jol júrý birshama qiyndyqtar týǵyzýda. Qazir munda tasjolǵa tuz ben qum sebilip, arnaiy tehnika tańerteńnen beri joldy tazartyp jatyr. Bul jumystarǵa 16 tehnika jumyldyrylǵan.
Al oblystyq tótenshe jaǵdailar qyzmeti shuǵyl sharalar qabyldap, kúsheitilgen jumys tártibine kóshti. Jurtty alys saparǵa shyqpaýdy eskertýde.
«Osy aýa raiynyń ózgerýine bailanysty TJD bazasynda oblystyq shtab quryldy. Jáne bir qala segiz aýdanda elektr jaryǵy óshken jáne joldardyń jabylýy oryn alyp jatqan aýdandarda saqtyq sharalary jumystar júrgizilýde», - deidi oblystyq TJD bastyǵynyń orynbasary Erik Sarybaev.
