Túrkistan oblysynda koronavirýs juqqan birinshi naýqas - áiel adamnyń otbasyndaǵy úsh adamnan virýs tabyldy. Bul týraly oblystyq taýarlar men kórsetiletin qyzmetterdiń sapasy men qaýipsizdigin baqylaý departamentiniń jetekshisi Nurbek Nyshanov habarlady.
Buǵan deiin jergilikti resmi oryndar áiel adamnyń 23 naýryzda Nur-Sultannan kelgenin, birneshe kúnnen soń dene qyzýy kóterilip, 30 naýryzda aýrýhanaǵa jatqyzylǵanyn habarlaǵan bolatyn.
1 sáýirde Jetisaidyń taǵy bir turǵynynan koronavirýs tabylǵan. Oblysta koronovirýs juqtyrǵan besinshi naýqas - er adam Almaty qalasynan kelgen. Ol Almatyda issaparda bolǵan. Kelgennen keiin testen ótip, virýs juqtyrǵany anyqtalǵan.
Bes naýqas ta - Jetisai aýdanynyń turǵyndary. Olar Jetisai aýdandyq aýrýhanasynda em qabyldap jatyr. Jaǵdaiy – birqalypty. Koronovirýs juqtyrǵan otbasymen qarym-qatynasta bolǵan barlyq adamdar anyqtalyp, oqshaýlanǵan. Almaty qalasynan kelgen naýqaspen qarym-qatynasta bolǵan adamdar anyqtalyp jatyr.
Qazir Túrkistan oblysynda shetelden kelgen 495 adam karantindik statsionarda jatyr.
Oblysta avtobeketter men avtovokzaldar, bazarlar ýaqytsha jabylǵan, qyzmet kórsetý oryndarynyń jumys ýaqyty qysqarǵan.
Qazirgi ýaqytta Túrkistan oblysynyń aýmaǵyna 40 blok post qoiylǵan. Onda oblysqa basqa aimaqtardan kelgen adamdardyń barlyǵynyń dene qyzýy tekserý baqylaýǵa alynǵan.
