Túrkistan oblysynda bes balaly múgedek áke baspanaly boldy. Qasietti ramazan aiynda armany oryndalǵan januianyń otaǵasy - ekinshi top múgedegi bolsa, otanasy - jumyssyz, dep habarlaidy QazAqparat tilshisi.
Qazaqstan musylmandary dini basqarmasynyń bas múftii Serikbai qajy Oraz Nur-Sultan qalasy men Almatydan keiin Túrkistanda aýyzashar berýge arnaiy keldi. Musylman qaýymy jinalǵan basqosýda qaiyrymdy azamattar tul jetim janǵa taǵy bir baspana tartý etti. Aimaqta mundai qýanyshty jańalyq jylda jalǵasyn tabýda. Máselen, ótken jyly 12 kópbalaly ana men az qamtylǵan otbasyǵa páter berilgen.
Túrkistan oblysynyń ákimi Ómirzaq Shókeev qaiyrymdylyq sharalaryn halyq arasynda keńinen nasihattap, túsindirýimiz kerek ekenin atap ótti.
«Qazaqstan musylmandary dini basqarmasynyń bas múftii Serikbai qajy Oraz arnaiy kelip otyr. Ózderińiz bilesizder, Elbasynyń kóregendigi, sarabdal saiasatynyń arqasynda osydan bir jyl buryn Túrkistan qalasy oblys ortalyǵy bolyp qaita quryldy. Senimdi aqtaý úshin bárimiz jumylýdamyz. Úkimet Túrkistan týraly 5 ret qaýly qabyldady. Munyń bári úlken jumysty talap etedi. Sondyqtan da bizge osyndai birlik, yntymaq óte qajet. Elbasynyń tapsyrmasymen birtalai áleýmettik bastamalardy iske asyryp jatyrmyz. Kópbalaly analar men áleýmettik jaǵdaiy tómen otbasylardy qoldaý jóninde jumystar júrgizilip jatyr. Sizderdi ramazan aiymen taǵy da quttyqtaimyn. Otbasylaryńyzǵa amandyq tileimin», - dedi oblys ákimi.
