Túrkistan oblysynda balyq sharýashylyǵyn damytý baǵytynda jumys jandanady. Oblys ákimi Darhan Satybaldynyń tóraǵalyǵymen ótken apparattyń aptalyq otyrysynda osy másele talqylandy, dep habarlaidy «Ult aqparat» oblys ákimdiginiń baspasóz qyzmetine silteme jasap.
Óńir basshysy balyq sharýashylyǵyn damytyp, ónimdilik pen eskporttyq áleýetti arttyrý jóninde tapsyrma berdi.
«Túrkistan oblysy boiynsha ár jylǵa arnalǵan balyq ósirý kólemi josparyn qaitadan qarap shyǵýdy tapsyramyn. Bul baǵytta jumysty shiratyp, balyq ónimi kólemin arttyrýǵa múmkindik bar dep oilaimyn. Ásirese eksporttyq áleýetti kóterýge basymdyq bergen jón. Jaýapty basqarmalar balyq sharýashylyǵyna investitsiia tartý, osy baǵytta jumys isteimin deitin ózimizdiń kásipkerlerge qoldaý kórsetýdi kúsheitsin. Sizder kásipkerlerdiń jaǵdaiyn túsinip, olarǵa qolaily múmkindik usynýlaryńyz kerek. Ekinshiden, balyq sharýashylyǵyn júrgizý úshin bekitilip berilgen 91 sý aidynyn qaitadan taldap, zerdeleńizder. Ár aýdan, qalaǵa, kásipkerge indikator bekitilip, onyń oryndalýy qadaǵalanýy tiis. Eger sý aidynyn tiimdi paidalanbasa, basqa azamattarǵa berý qajet», – degen Darhan Satybaldy jaýapty basshylarǵa osy salany damytý boiynsha tyń usynystar men investitsiialyq jobalardy ázirleýdi tapsyrdy.
Oblystyq tabiǵi resýrstar jáne tabiǵat paidalanýdy retteý basqarmasy basshysynyń mindetin atqarýshy Nurjan Iztileýovtiń aitýynsha, «Balyq sharýashylyǵyn damytýdyń óńirlik baǵdarlamasy» bekitilgen. Baǵdarlamaǵa sáikes, Túrkistan oblysynda 2030 jylǵa deiin taýarly balyq ósirý kólemin 20 myń tonnaǵa jetkizý josparlansa, 2022 jylǵa jospar – 6,1 myń tonna. 10 aida oryndalǵany – 5 myń tonna. Jospar jyl sońyna deiin tolyq oryndalady dep kútilip otyr.
Qazirgi tańda oblys aýmaǵynda 126 jergilikti mańyzy bar sý aidyny tirkelgen, onyń ishinde balyq sharýashylyǵyn júrgizýge jaramdysy 104 birlik bolsa, 91 sý aidyny balyq sharýashylyǵyn júrgizý úshin bekitilip berilgen.
Balyqty jasandy jolmen ósirý boiynsha oblysta 2020 jyly – 5,2 myń tonna, 2021 jyly – 5,7 myń tonna, 2022 jyldyń 10 aida 5,1 myń tonna (jospar 6,1 myń tonna) taýarly balyq óndirilip, ósim 8,5 %-dy qurady. Bul – respýblika boiynsha eń joǵarǵy kórsetkish.
Baǵdarlamada oblys boiynsha 2030 jylǵa deiin 53 toǵandyq balyq óndiretin sharýashylyq qurý, 11 sharbaqtyq sharýashylyq, 4 sýmen qamtamasyz etý tsikli tuiyqtalǵan balyq ósirý sharýashylyǵyn qurý jáne 71 kólde taýarly balyq óndirý sharýashylyqtaryn qurý kózdelgen. 2023 jyly balyq sharýashylyǵyn sýbsidiialaýǵa 500 mln. teńge josparlanǵan. Qajettilikke bailanysty qarjy kólemin arttyrý boiynsha qosymsha usynystar engizilmek.
