Túrkistan qalasy men oblystyń birneshe aýdanynda kámeletke tolmaǵandarǵa jynystyq zorlyq jasady degen kúdikpen úsh er adam ustalyp, qamaýǵa alynǵan. Bul týraly advokat Lázzat Raqysheva áleýmettik jelidegi paraqshasynda málimdedi, dep habarlaidy ult.kz.
Advokattyń aitýynsha, Túrkistan qalasynda 61 jastaǵy er adam 6 jastaǵy qyzǵa jynystyq zorlyq jasady degen kúdikke ilingen. Ol qamaýǵa alynǵan.
Saýran aýdanynda 53 jastaǵy azamat 7 jastaǵy qyzǵa qatysty osyndai qylmys jasady degen kúdikpen ustalǵan. Al Shardara aýdanynda 31 jastaǵy er adam 16 jastaǵy jasóspirimge jynystyq zorlyq kórsetti degen kúdikke ilingen.
Lázzat Raqysheva qylmystyq is aiaqtalǵannan keiin balalardyń ári qaraiǵy taǵdyryna alańdaitynyn jetkizdi.
Advokattyń málimetinshe, buǵan deiin Túrkistan oblysynda jynystyq zorlyqtan zardap shekken eki balanyń ata-anasy kúdiktilerden aqsha alyp, isti jeńil bapqa qaita saralaýǵa kelisken jaǵdailar bolǵan.
Onyń sózinshe, bir otbasyna 5 million teńge, ekinshisine 2 million teńge usynylǵan. Keiin ata-analar kúdiktilerdi keshirgen.
Raqysheva mundai jaǵdaida basty nazar balanyń qaýipsizdigi men psihologiialyq jaǵdaiyna aýdarylýy kerek ekenin atap ótti. Onyń pikirinshe, jynystyq zorlyqtan zardap shekken balalarǵa kómek tek tergeý kezinde ǵana emes, qylmystyq is aiaqtalǵannan keiin de kórsetilýi qajet.
Advokat balalardyń psihologiialyq jaraqatyn jeńildetý úshin kásibi mamandardyń uzaq merzimdi qoldaýy mańyzdy ekenin aitty.
