Túrkistan oblysynda III toqsanda 1-5 synyp jáne bitirýshi 9-ynshy, 11-inshi synyp oqýshylary dástúrli formatta oqityn bolady. Osy jáne ózge de máseleler oblys ákimi Ómirzaq Shókeevtiń tóraǵalyǵymen ótken lezdemelik májiliste qaraldy, dep habarlaidy "Ult aqparat".
Málim bolǵandai, Túrkistan oblysynda III toqsanda qashyqtan oqý jalǵasady. Tek 1-5 synyp, 9 ben 11-synyp oqýshylary, iaǵni bitirýshi synyptar sanitarlyq talaptardy saqtai otyryp, mektepte oqityn bolady.
Túrkistan oblysynda oqýshylar kompiýtermen 100% qamtylǵan. Mektepterde kompiýterlerge qajettilikti joiý úshin QR Úkimeti rezerviniń qarajatynan 57 190 kompiýter satyp alyndy. Sondai-aq, mektep qorynan, jergilikti biýdjet pen demeýshiler esebinen satyp alynǵan 28 101 kompiýter oqýshylarǵa berildi. Oblys aýmaǵyndaǵy 918 mekteptegi oqýshylardyń jalpy sany – 499 975.
Sondai-aq otyrysta bilim bólimderin basqarý jáne biýdjet qarjysyn ákimshilendirý fýnktsiialaryn aýdandyq deńgeiden oblystyq deńgeige ótkizý máseleleri, iaǵni bilim salasyndaǵy basqarý júiesiniń ózgerýine qatysty atqarylǵan jumystar baiandaldy.
Oblys aýmaǵynda koronavirýs infektsiiasymen kúres jumystarynyń barysy da sóz boldy. Bir apta ishinde óńirde Covid-19 virýsyn juqtyrǵan 56 adam tirkelgen. Ósý úrdisi baiqalǵan Maqtaaral, Jetisai men Sairam aýdandarynda shekteý sharalaryn qatańdatý jumystary júrgizilýde.
Ó.Shókeev aýdan, qala ákimderine kemshilikterdi joiýdy, al oǵan jol bergen jaýapty laýazymdy tulǵalardy tártiptik jaýapkershilikke tartý máselesin qarastyrýdy júktedi.
«Qaitadan tártip ornatyńyzdar. Kei jerler, ásirese meiram kúnderinen keiin bosańsyp ketip jatyr. Buǵan jol bermeý kerek. Araqashyqtyqty saqtaý máselesin, maska rejimin, karantin shekteýleriniń saqtalýyn qatań qadaǵalaý qajet. Barlyq aýdan, qala ákimderi buǵan tikelei jaýap beredi», – dedi oblys ákimi.
Sonymen qatar Ómirzaq Shókeev apparat májilisinde Túrkistan qalasyn damytý boiynsha birqatar tapsyrmalar berdi. Qalany kórkeitý, kógaldandyrý máseleleri men infraqurylymdy damytýdy kúsheitýdi basa aitty.
Budan bólek, sý qoimalarynyń qurylysy men kólder júiesiniń jańartýyn kóktemge deiin tolyq aiaqtaýdy mindettedi.
