Sýret: otyrar.kz
Túrkistan oblysynda 5 jasar qyzdy zorlap, aiaýsyz óltirgen pedofilge qatysty úkim shyǵaryldy, dep habarlaidy "Ult aqparat" Otyrar.kz portalyna silteme jasap.
Sot otyrysy tergeý izoliatorynda ótti. 48 jastaǵy er adam ómir boiyna bas bostandyǵynan aiyryldy.
“QR Qylmystyq kodeksiniń 99-baby 3-tarmaǵy, 121-baby 4-tarmaǵy boiynsha kúdiktini ómirbaqi bas bostandyǵynan aiyrý týraly úkim shyǵaramyn” – dedi Túrkistan oblysynyń qylmystyq isteri jónindegi mamandandyrylǵan aýdanaralyq sotynyń sýdiasy Dáýren Madaliev.
Sonymen qatar sottalýshy himiialyq kastratsiia men májbúrlep emdeý sharasyna tartylady. Budan bólek, jábirlenýshilerdiń talaby boiynsha 100 mln. teńge kóleminde moraldyq shyǵyn óteletin boldy.
Osylaisha, qaza tapqan qyzdyń ata-anasynyń barlyq talap-aryzy oryndaldy. Jábirlenýshi taraptyń zańgeriniń aitýynsha, jaryssózde prokýror ómir boiyna bas bostandyǵynan aiyrý jáne kastratsiia jasaýdy suraǵan.
Sýret: otyrar.kz
Eske salaiyq, eldi dúrliktirgen oqiǵa biyl jazda boldy. 13 shildede úidiń aldynda oinap júrgen 5 jasar Erkejan Nurmahan joǵalyp ketti. Ony búkil aýyl izdedi. Al beinebaqylaý kameralary balanyń úiden alys ketpegenin kórsetti. Sóitip, 48 jastaǵy kórshisi kúdikke ilindi. Onyń úiine eki ret tintý jasalǵan. Al úshinshi ret izdegende balanyń denesi tabyldy.
"Úiine úshinshi ret barǵanda men qoranyń tóbesindegi shiferdi baiqadym. Dosym ekeýimiz ústine shyǵyp, kóterip qalsaq, Erkejannyń denesi jatyr, ústinde kiimi bolǵan joq", - deidi Jibek Joly aýlynyń turǵyny Erjan Ahmetov.
Balanyń denesin pyshaqpen tilgilegen. Al betinde kógergen izder bolǵan. Aýyl turǵyndary pedofildi óz qolymen jazalamaq boldy. Úiin jaǵyp jibere jazdady. Biraq politsiia ashýǵa mingen halyqty toqtatty.
Pedofil buǵan deiin adam óltirgen úshin túrmede 10 jyl otyryp shyqqan. 2023 jyly mamyr aiynda densaýlyqqa aýyr ziian keltirgeni úshin úsh jylǵa bas bostandyǵyn shekteý jazasy kesilgen.
