Foto: ashyq derekkóz
Túrkistan oblysyndaǵy aýyldardyń birinde úlken daý týdy — 15 jastaǵy mektep oqýshysy ózinen jasy áldeqaida úlken kórshisinen, iaǵni 71 jastaǵy er adamnan bosanǵan. Aýyl turǵyndary kúdiktiniń otbasyn eldi mekennen kóshirip jiberýdi talap etýde, dep habarlaidy Ult.kz Tengrinews.kz saityna silteme jasap.
Áleýmettik jelilerde kámeletke tolmaǵan qyzdyń júktiligi týraly aqparat taraǵan. Jariialanǵan jazbada qyzdyń týǵan-týystary onyń dene bitimindegi ózgeristerdi júktiliktiń jetinshi aiynda ǵana baiqaǵany aitylǵan. Biyl aqpanda qyz sábiin dúniege ákelgen. Al jaqynda balanyń ákesi bolýy múmkin delingen 71 jastaǵy kórshi ustaldy. Kei derekterge súiensek, kúdikti qyzdyń týysqany bolýy yqtimal.
Oqiǵa jaily habar taraǵan soń, aýyl turǵyndary ashýǵa minip, kúdiktiniń otbasyna aýyldan ketýdi talap etken. Janjal sáti túsirilgen video áleýmettik jelilerde tarady.
Túrkistan oblystyq politsiia departamenti kúdiktiniń ustalyp, ýaqytsha ustaý izoliatoryna qamalǵanyn málimdedi.
«Keles aýdany turǵynynyń kámeletke tolmaǵan qyzyna qatysty zańsyz áreketter týraly aryzy negizinde qylmystyq is qozǵaldy. Barlyq mán-jai anyqtalýyna baǵyttalǵan qajetti tergeý jáne jedel sharalar júrgizilýde. Tergeý nátijesi boiynsha tiisti protsessýaldyq sheshim qabyldanady», — delingen oblystyq politsiia departamentiniń habarlamasynda.
Sondai-aq vedomstvoda istiń tergelýi politsiia departamenti basshylyǵynyń erekshe baqylaýynda ekeni atap ótildi.
Eske salaiyq, buǵan deiin Aqtóbe oblysynda 14 jastaǵy oqýshy sabaq ústinde bosanǵan bolatyn. Al jańa týǵan náresteniń ákesi retinde qyzdyń ájesiniń 64 jastaǵy kúieýi kúdikke ilingen. Bul oqiǵa boiynsha QR Qylmystyq kodeksiniń 120-babynyń 4-bóligi — «Kámeletke tolmaǵandy zorlaý» baby boiynsha is qozǵalyp, kúdiktige ómir boiyna bas bostandyǵynan aiyrý jazasy qarastyrylǵan.
