Kúdikti qylmys ústinde qolǵa tústi. Ol izin jasyrý úshin dúkendegi beinebaqylaý kameralaryn óshirip otyrǵan, dep habarlaidy QazAqparat.
Sairam aýdandyq politsiia bólimine aryzdanǵan jergilikti turǵyn kiim-keshek dúkeninen taýarlarynyń urlanǵandyǵyn kórsetken. Jábirlenýshige keltirilgen shyǵyn kólemi shamamen 10 million teńgeni quraǵan. Atalǵan jaitty politsiia qyzmetkerleri QR QK-niń 188-baby «Urlyq» boiynsha tirkeýge aldy.
«Jedel ýákilder shuǵyl izdestirý is-sharalary kezinde kúdiktiniń qaita qylmys jasaýǵa kelýi múmkin ekenin alǵa tartyp, ony quryqtaýǵa arnaiy jospar qurdy. Nátijesinde túngi ýaqytta sairamdyq saqshylar kúdiktini qylmys ústinde ustady. Ol qoima ishinen kiim-keshekti zańsyz alyp shyǵyp, kóligimen áketip bara jatqan jolda qolǵa tústi» - delingen Túrkistan oblysy politsiia departamenti taratqan habarlamada.
Kúdikti jábirlenýshiniń júk tasýmen ainalysatyn jumysshysy bolyp shyqqan. Ol urlyq qylmysyn budan buryn da 3 ret jasapty. Birinshi ret jaryq sóngen ýaqytta beinebaqylaý kameralary isteimeitinin paidalanyp, 2 qap kiim-keshekti alyp ketken. Al qalǵan kezderi beinekamerany óshirip qoiyp, josparyn júzege asyryp júripti. Urlaǵan jańa kiimderdi Shymkentte 3 million teńgege satyp, aqshany óz qajettiligine jumsaǵan.
