Túrkistan oblysyn gazdandyrý baǵytyndaǵy jumys júieli ári sapaly atqarylýǵa tiis. Oblys ákimi Darhan Satybaldynyń tóraǵalyǵymen ótken májiliste Sozaq, Saýran, Báidibek, Ordabasy aýdandary men Kentaý jáne Túrkistan qalalaryn gazben qamtý jumystary men ózekti máseleleri talqylandy. Óńir basshysy aýdan, qala ákimderine jumysty shiratýdy tapsyryp, birqatar jaýapty tulǵaǵa aýyzsha eskertý berdi.
«Aýdandar men qalalardy aralaý barysynda turǵyndar kommýnaldyq-sharýashylyq, ásirese, gaz máselesin kóteredi. Turǵyndardy gazben qamtý – bizdiń mindetimiz. Jumysyn durys atqarmaǵan merdigerlermen zań aiasynda sóilesińizder. Gazben qamtý boiynsha aýdandar Jol kartalaryn usynsyn. Osy bir jospar negizinde júieli jumys atqaraiyq. Ekinshiden, aýdan, qala ákimdikteri men basqarmalar arasynda bailanys bolýy kerek. Habarlasyp, el múddesine qatysty árbir máseleni jedel sheshýdi qolǵa alǵan jón. Gazdy kútip otyrǵan aýyldar bar. Kezeń-kezeńimen biýdjetke engizip, tiisti jumystardy atqarý qajet», – dedi Darhan Satybaldy.
Túrkistan oblysynyń energetika jáne turǵyn úi-kommýnaldyq sharýashylyq basqarmasy basshysynyń orynbasary Roza Sarievanyń aitýynsha, 2022 jylǵy 1 qańtardaǵy jaǵdai boiynsha 831 eldi mekenniń 457-si tabiǵi gazben qamtylǵan. Eldi mekendegi halyq sanymen eseptese, 1 mln. 529 myń turǵyn nemese turǵyndardyń 73,7 paiyzy tabiǵi gazdy qosý múmkindigine qol jetkizgen.
2022 jyly 70 nysannyń qurylysyna 15,9 mlrd. teńge bólinip, onyń ishinde 9 nysannyń (10 eldi meken, 1 AGTS, 32198 turǵyn) qurylysy 2022 jyly aiaqtalady. Qalǵan 61 nysan 2023 jylǵa ótpeli.
Biylǵy jyl qorytyndysymen, 467 eldi meken (56,2%) nemese 1 mln. 561 myń halyq (75,2%) tabiǵi gazdy qosýǵa múmkindik alady.
Aldaǵy 3 jylda qosymsha 255 eldi mekendi tabiǵi gazǵa qosyp, nátijesinde 2025 jyly qamtý deńgeii 722 eldi mekenge (86,8%) nemese 2 mln. halyqqa jetkizilmek.
Biyl basqarmanyń mamandary aýdan, qala ákimdikterimen birlesip, qurylysy júrgizilip jatqan nysannyń 70-ine zerdeleý jumystaryn júrgizip, onnan astamynan kemshilikter anyqtalǵan. Tiisti usynystar berilip, kemshilikterdi joiý jumystary qolǵa alynǵan.
Jiynda Sozaq, Saýran, Báidibek, Ordabasy aýdandary men Kentaý jáne Túrkistan qalalary basshylarynyń gazǵa qatysty usynystary men esepteri tyńdalyp, oblys ákimi tarapynan tiisti tapsyrmalar berildi.
