2020 jyldyń 1 qyrkúiegindegi esep boiynsha Túrkistan oblysy halqynyń sany 2 036 029 adamdy qurady. Onyń ishinde qalalyq jerde 412 819 adam (20,3%), aýyldyq jerde 1 623 210 adam (79,7%) bar, dep habarlaidy oblystyq ákimdiktiń baspasóz qyzmeti.
Ótken jyldyń tiisti ýaqytymen salystyrǵanda halyq sany 1,4%-ǵa ósken. Respýblika boiynsha oblys týý men tabiǵi ósim kórsetkishteri boiynsha 1-orynda. Bul týraly Óńirlik kommýnikatsiialar qyzmetinde oblystyq Statistika departamentiniń basshysy Aidar Ábildabekov málimdedi.
Budan ózge, 2020 jyldyń II toqsanynda Túrkistan oblysy boiynsha bir qyzmetkerdiń ortasha ailyq ataýly jalaqysy - 168 301 teńgeni quraǵan.
«Eń joǵary ortasha ailyq jalaqy Sozaq aýdanynda - 243 324 teńge bolyp belgilense, eń tómen jalaqy Saryaǵash aýdanynda – 137 498 teńge kóleminde. 2020 jylǵy II-shi toqsanda eń joǵary ailyq jalaqy «Karjy jáne saqtandyrý» salasynda - 220 355 teńge bolyp belgilense, eń tómeni «Jyljymaityn múlikpen jasalatyn operatsiialar» salasynda - 70 121 teńge. Oblysta azyq-túlik taýarlarynyń baǵalary - 7,1%-ǵa, azyq-túlik emes taýarlary – 3%-ǵa, aqyly qyzmetter – 5,5%-ǵa qymbattaǵan», - dedi departament basshysy.
Sonymen qatar, 2020 jyldyń qańtar-maýsym ailary boiynsha Túrkistan oblysynyń jalpy óńirlik ónim kólemi 770 mlrd. teńgeni qurap, naqty kólem indeksi boiynsha oblys respýblikada birinshi oryndy iemdengen. Jalpy óńirlik ónimniń qurylymynda ónerkásiptiń úlesi – 19,7%, aýyl, orman jáne balyq sharýashylyǵy – 14,6%, bilim berý – 12,7%-dy alyp otyr.
Aǵymdaǵy jyldyń qańtar-qyrkúiek aralyǵynda Túrkistan oblysy boiynsha negizgi kapitalǵa salynǵan investitsiia kólemi - 414 mlrd 53 mln. teńgege jetip, 2019 jyldyń tiisti kezenimen salystyrǵanda 66,7%-ǵa artqan. Negizgi investitsiialyq salymdardyń 86,2%-yn shaǵyn kásiporyndar júzege asyrǵan.
