Búgin QR Prezidenti ákimshiliginiń kelisimimen jáne Túrkistan oblysy ákiminiń ókimimen Qairat Núkenov Túrkistan oblysy ákiminiń birinshi orynbasary qyzmetine taǵaiyndaldy, dep habarlaidy "Ult aqparat" Túrkistan oblysy ákiminiń baspasóz qyzmetine silteme jasap.
Oblys ákimi Janseiit Túimebaev jańa orynbasardyń jumysyna sáttilik tilep, aktiv aldynda tanystyrdy. Óz kezeginde Qairat Núkenov jaýapty qyzmetti senip tapsyrǵan óńir basshysyna alǵysyn bildirip, óz mindetin barynsha adal atqaratynyn jetkizdi.
Qairat Temirshotuly Núkenov 1970 jylǵy 15 qyrkúiekte Pavlodar oblysy, Jelezin aýdany, Zaharovka aýylynda dúniege kelgen.
1987 jyly Jelezin orta mektebin bitirip, eńbek jolyn «Jelezin» kensharynyń mal sharýashylyq kesheninde jumysshy retinde bastady.
1988-1990 jyldar aralyǵynda áskeri qyzmetin ótedi. Áskerden keiin «Trestjilstroi» sharýashylyq esepti jastar birlestiginde ekspeditor bolyp istedi. 1992 jyldan bastap kommertsiialyq qurylymdarda basshylyq laýazymdaryn atqardy. 2002 jyly Resei Federatsiiasynyń Omby qalasyndaǵy Sibir memlekettik avtomobil joldary akademiiasyn «Ekonomika jáne kásiporyndardaǵy basqarý» mamandyǵy boiynsha, 2014 jyly P.A. Stolypin atyndaǵy Omby agrarlyq ýniversitetin «Jemis-kókónis jáne júzim sharýashylyǵy» mamandyǵy boiynsha támamdady.
2012-2013 jyldar aralyǵynda Jelezin aýdanynyń ákimi, 2013 jyly Pavlodar oblysy kásipkerlik jáne saýda basqarmasynyń basshysy boldy. 2014 jyldyń maýsym aiynan bastap Pavlodar oblysy Aqsý qalasynyń ákimi, 2016 jyldyń sáýirinen bastap Ekibastuz qalasynyń ákimi bolyp qyzmet atqardy.
