Eki aptada 23 adamǵa qatysty 17 aiyptaý úkimi shyǵaryldy. Bul týraly QR Sybailas jemqorlyqqa qarsy is-qimyl agenttigi 1-shi departamentiniń asa mańyzdy ister jónindegi tergeýshisi Daniiar Biǵaidarov málim etti, dep habarlaidy QazAqparat.
«Eki apta ishinde Sybailas jemqorlyqqa qarsy qyzmetpen buryn aiaqtalǵan qylmystyq ister boiynsha 23 adamǵa qatysty 17 aiyptaý úkimi shyǵaryldy, olardyń 15-i ártúrli deńgeidegi basshylar. Bas bostandyǵynan 7 adam aiyryldy, beseýiniń bas bostandyǵy shekteldi, eselik aiyppul somasy 80 mln teńgeden astam eselik aiyppuldarǵa 10 adam tartyldy. Sonymen qatar, jymqyrý faktileri boiynsha - 4, alaiaqtyq úshin – 3, para bergeni úshin - 3, para alǵany úshin – 10 jáne qujattardy burmalaǵany úshin 2 adam jazaǵa tartyldy», - dedi D. Biǵaidarov Facebook paraqshasynda ótken onlain brifingide.
Onyń sózine qaraǵanda, 27 qazanda Shymkent qalasy Qarataý aýdandyq sotynyń úkimimen Túrkistan oblystyq sotynyń azamattyq ister jónindegi alqa tóraǵasy Bekimbetov 5 jyl merzimge bas bostandyǵynan aiyryldy.
«Osy úkimmen «Aziia Stroi» JK bankrottyq basqarýshysy Erejepov 2 jyl 6 ai merzimge bas bostandyǵynan aiyryldy. Bekimbetov Erejepovten jeke kásipkerdiń qorytyndy esebi men taratý teńgerimin bekitý týraly sot uiǵarymyn oryndaýdy keiinge qaldyrý týraly azamattyq is boiynsha oń sheshim shyǵarǵany úshin 300 myń teńge somasynda para alý kúdigine ilindi», - dedi agenttik ókili.
