Túrkistan qalasy oblys ortalyǵy bolǵannan beri halyqpen birge kólik sany da kóbeidi. Osyǵan orai jańadan qurylǵan Túrkistan oblysynyń turǵyndary men avtokólikterdiń júrip-turýyna qolaily bolýy úshin barlyq jaǵdai jasalyp otyr, dep habarlaidy "Ult aqparat".
Jol boiyna sońǵy úlgidegi beinebaqylaý kameralary ornatylýda.
Mundaǵy basty maqsat – jol qozǵalysy erejesiniń buzylýyna jol bermeý, jol-kólik oqiǵasynyń sanyn azaitý.
Osy baǵytta Túrkistan qalasynyń kólik kóp júretin oryndarynda 10 «Sergek» avtomatty qurylǵysy ornalastyrylyp, 5 qańtardan bastap óz qyzmetin atqarýda.
Naqtyraq aitsaq, Táýke han kóshesinde - 3, S.Qojanov kóshesinde - 2 «Sergek» beinebaqylaý kamerasy qoiylǵan. Al Baiburt, B.Sattarhanov, Qazybek bi kóshelerinde, Qyzylorda tasjoly boiynda, Qazaqstanǵa 30 jyl dańǵylyna bir danadan ornatyldy.
Túrkistan oblysy PD Ákimshilik politsiia basqarmasy bastyǵynyń orynbasary politsiia polkovnigi Ǵalymjan Esimovtiń aitýynsha, bul qurylǵyny ornatýdyń negizgi sebebi - qaýipsizdiktiń barynsha joǵary deńgeiin qamtamasyz etý jáne quqyq buzýshylyqtardy avtomatty túrde fotobeinetirkeý júielerine engizý.
«Sergek kameralary ruqsatty jyldamdyqty arttyrý, qyzylǵa ótý, jol belgileri men jolaqtarynyń talaptaryn buzý, ruqsat etilmegen jerde toqtaý men turý jáne avtobýs jolaǵymen júrý siiaqty ereje buzýshylyqtardy tirkep, kólik iesine aiyppul jazyp bere alady. Máselen, osy «Sergek» qurylǵysy ornatylǵan 2 kúnniń ishinde jyldamdyqty asyrý boiynsha 25 ákimshilik quqyq buzýshylyq anyqtalyp, júrgizýshilerge 500 000 teńgege jýyq aiyppul salynǵan. Jalpy aita ketetin jait, jol apaty saldarynan 2020 jyly qaza tapqandar sany ótken jylmen salystyrǵanda 46 paiyzǵa azaiǵan. Al, jaraqat alǵandar 115-ten 82-ge kemigen. Kórsetkishterdiń bulai tómendeýine osy ornatylyp jatqan beinebaqylaý kameralarynyń da septigi tiip otyr. Sondyqtan birinshi kezekte ózińiz ben ózge de júrgizýshi, jolaýshylardyń ómiri úshin jol erejelerin saqtap júrińiz. Asyqpańyz, jyldamdyqty asyrmańyz», - dep atap ótti ol.
