Túrkistan oblysynda «Túrkistan – adaldyq alańy» jobalyq keńsesiniń uiymdastyrýymen birqatar dárihanalarǵa dári-dármek baǵasynyń turaqtylyǵyn qamtamasyz etý maqsatynda monitoring júrgizildi. Shara barysynda dárihanalarda kassa apparatynyń bolmaýy jáne dári-dármek baǵasynyń negizsiz kóterilýi syndy kemshilikter anyqtalǵan, dep habarlaidy QazAqparat.
Arnaiy jumysshy toptyń quramynda QR Sybailas jemqorlyqqa qarsy is-qimyl agenttiginiń Túrkistan oblysy boiynsha departamentiniń ókili, aǵa ofitser Aqtóre Talǵatuly men «Túrkistan – adaldyq alańy» jobalyq keńsesiniń menedjerleri, oblystyq taýarlar men kórsetiletin qyzmetterdiń sapasy, qaýipsizdigin baqylaý departamentiniń jáne QR UEM «Básekelestikti qorǵaý jáne damytý» Túrkistan oblysy boiynsha departamentiniń qyzmetkerleri jáne oblystyq «Atameken» QR Ulttyq kásipkerler palatasynyń ókilderi qatysty.
Top músheleri oblys ortalyǵyndaǵy dárihanalarda dári-dármekterdiń baǵasyna zerdeleý jumysyn júrgizip, baǵany negizsiz kótergenderge eskertý jasady.
Budan bylai oblys turǵyndaryna dárihanalardaǵy dári-dármek qunynyń negizsiz kóterilgendigin baiqaǵan jaǵdaida 109, 102 jáne agenttiktiń 1424 Call ortalyǵyna nemese +7776-837-09-00 nómirine Whatsapp qosymshasy arqyly joldaýǵa bolatyny habarlandy. Onda jergilikti halyq dárihana ataýy men ornalasqan jerin jáne dybys pen beinematerialdar jibere alady. Aldaǵy ýaqytta «Túrkistan – adaldyq alańy» jobalyq keńsesi dári-dármek qunyna turaqty monitoring júrgizýdi júieli túrde jalǵastyrady.
