Túrkistan qalasynda «Nurorda» mektebi salynady. Atalǵan bastama boiynsha Túrkistan oblysynyń ákimi investorlarmen kezdesip, jobany talqylady, dep habarlaidy «Ult aqparat» oblys ákimdiginiń baspasóz qyzmetine silteme jasap.
Aldaǵy ýaqytta Túrkistan qalasynda 1000 oqýshyǵa arnalǵan úlken mektep salynbaq. Sonymen birge 400 oryndyq jataqhana men 320 oryndyq balabaqsha da boi kótermek. Oblys ákimi bilim salasyna investitsiia quiamyn deýshilerge qoldaý bolatynyn jetkizdi.
«Biz qazir óńirge investitsiia tartý jumystaryn jandandyryp jatyrmyz. Jańa mektep salamyn deitin azamattardy qoldaimyz. Eń bastysy, jumys kestesi bekitilip, qurylys ýaqtyly aiaqtalýy tiis. Jerdi alyp, tiisti jumys júrgizbegenderden jer qaitarylady. Bizdiń bilimge jaýapty basqarma investormen tyǵyz bailanysta jumys istep, bilim uiasynyń óńirge paidaly bolýyna, adami áleýetti arttyrýǵa yqpal etýine kúsh salǵany jón», – degen Darhan Satybaldy jaýapty basshylarǵa atalǵan jobaǵa qajetti qujattar men máselelerdi jan-jaqty qaraý jóninde tapsyrma berdi. Sonymen birge investorǵa aýyldarda sapaly bilim uialaryn ashý, bilim salasynan ózge de investitsiialyq jobalarǵa qarjy salýǵa, áriptestikti nyǵaitý jóninde usynysyn jetkizdi.
«Dial-Stroi» JShS-niń basshysy, investor Ǵabit Mamatraiymov atalǵan jobanyń jospary men qarajaty daiyn ekenin, eger birqatar uiymdastyrý jumystary rettelse, qurylysty kelesi jyly bastaitynyn aitty.
«Jiyrma jyldan beri qurylys salasyndamyn. Ózim Túrkistannyń týmasy bolǵandyqtan osy qalaǵa mektep ashýdy perzenttik paryzym dep esepteimin. 10 gektar aýmaqta úlken mektep, jataqhana jáne balabaqsha salýdy josparlap otyrmyz. Sonymen birge mektep janynan shaǵyn saiabaq daiarlanyp, kógaldandyrý jumystary da júrgiziledi. Maqsatymyz – óńir jastarynyń bilim deńgeiin kóterý, osy salaǵa kómektesý», – dedi investor.
«Bilim-innovatsiia» halyqaralyq qoǵamdyq qorynyń prezidenti Darhan Óte osy qorǵa qarasty litseiler men «Nurorda» jeke menshik mektepteriniń artyqshylyqtary men múmkindikteri týraly baiandady.
Búginde «Bilim-innovatsiia» halyqaralyq qoǵamdyq qory quramynda 30 mektep-litseileri bar. 1700-ge jýyq muǵalim bilim beredi. Ótken oqý jylynda 1969 túlektiń 1185-i granttarǵa ie bolǵan.
