Túrkimenstan biligi elde “koronavirýs” sózin aitýǵa tyiym saldy. Eldegi memlekettik telearna, basylymdar bul sózdi qoldanbaidy. Mektep men emhanalarda taratylyp jatqan broshiýralarda da “koronavirýs” sózi joq. Bul týraly Azattyqtyń Túrkimen qyzmeti men Turkmenistan Chronicle saityna silteme jasaǵan "Shekarasyz tilshiler" halyqaralyq uiymy habarlady.
Azattyqtyń Túrkimen qyzmetiniń tilshisiniń dereginshe, kóshede “koronavirýs” sózin aitqandar ustalýy múmkin. Buǵan qosa, politseiler qarapaiym kiimmen jurt arasyna kirip, jurttyń sózin tyńdai bastaǵan.
“Túrkimenstan biligi radikaldy túrde jurtqa “koronavirýs” sózin aittyrmai óz halqynyń basyn qaterge tigip otyr” dep málimdedi “Shekarasyz tilshiler”.
Túrkimenstan biligi koronavirýs juqtyrǵandar jaily habarlanbady. Bilik elde 1 sáýirden bastap qyzmet kórsetý ortalyqtaryn, saýda oryndaryn, naýbaihanalardy jaýyp jatyr. Mektepterdegi demalys ýaqyty sozyldy. Buǵan qosa, kóshede jurttyń dene qyzýyn ólshei bastaǵan. Azattyqtyń Túrkimen qyzmetiniń derekkózderi elde koronavirýs juqtyrǵandar sany kúnnen-kúnge ósip kele jatqanyn, biraq bilik habarlamai otyrǵanyn aitady.
