تٷركٸمەنستان بيلٸگٸ ەلدە “كوروناۆيرۋس” سٶزٸن ايتۋعا تىيىم سالدى. ەلدەگٸ مەملەكەتتٸك تەلەارنا, باسىلىمدار بۇل سٶزدٸ قولدانبايدى. مەكتەپ مەن ەمحانالاردا تاراتىلىپ جاتقان بروشيۋرالاردا دا “كوروناۆيرۋس” سٶزٸ جوق. بۇل تۋرالى ازاتتىقتىڭ تٷركٸمەن قىزمەتٸ مەن Turkmenistan Chronicle سايتىنا سٸلتەمە جاساعان "شەكاراسىز تٸلشٸلەر" حالىقارالىق ۇيىمى حابارلادى.
ازاتتىقتىڭ تٷركٸمەن قىزمەتٸنٸڭ تٸلشٸسٸنٸڭ دەرەگٸنشە, كٶشەدە “كوروناۆيرۋس” سٶزٸن ايتقاندار ۇستالۋى مٷمكٸن. بۇعان قوسا, پوليتسەيلەر قاراپايىم كيٸممەن جۇرت اراسىنا كٸرٸپ, جۇرتتىڭ سٶزٸن تىڭداي باستاعان.
“تٷركٸمەنستان بيلٸگٸ راديكالدى تٷردە جۇرتقا “كوروناۆيرۋس” سٶزٸن ايتتىرماي ٶز حالقىنىڭ باسىن قاتەرگە تٸگٸپ وتىر” دەپ مەلٸمدەدٸ “شەكاراسىز تٸلشٸلەر”.
تٷركٸمەنستان بيلٸگٸ كوروناۆيرۋس جۇقتىرعاندار جايلى حابارلانبادى. بيلٸك ەلدە 1 سەۋٸردەن باستاپ قىزمەت كٶرسەتۋ ورتالىقتارىن, ساۋدا ورىندارىن, ناۋبايحانالاردى جاۋىپ جاتىر. مەكتەپتەردەگٸ دەمالىس ۋاقىتى سوزىلدى. بۇعان قوسا, كٶشەدە جۇرتتىڭ دەنە قىزۋىن ٶلشەي باستاعان. ازاتتىقتىڭ تٷركٸمەن قىزمەتٸنٸڭ دەرەككٶزدەرٸ ەلدە كوروناۆيرۋس جۇقتىرعاندار سانى كٷننەن-كٷنگە ٶسٸپ كەلە جاتقانىن, بٸراق بيلٸك حابارلاماي وتىرعانىن ايتادى.
