Túrkimenstan prezidenti Gýrbangýly Berdimuhamedov uly Serdardy ekonomika jáne halyqaralyq qarjy uiymdary jónindegi vitse-premer qyzmetine taǵaiyndady. Bul jóninde túrkimen prezidenti 9 shildede ótken ministrler kabinetiniń otyrysy kezinde málimdedi, dep habarlaidy Azattyq.
39 jastaǵy Serdar Berdimuhamedov vitse-premer qyzmetine taǵaiyndala otyryp, osyǵan deiin atqarǵan Joǵary baqylaý palatasynyń tóraǵasy qyzmetinen alynyp, Qaýipsizdik keńesi quramynan shyǵaryldy.
Túrkimenstan prezidenti ulynyń saiasi mansaby 2016 jyldyń aiaǵynda bastaldy. Sol jyly ol parlament múshesi bolyp sailanǵan.
Túrkimenstandaǵy resmi basylymdarda ony "halyq uly" dep ataidy. Al onyń ákesimen birge kóp aldyna shyǵýyn "býyndar almastyǵynyń simvoly" retinde sipattaidy. Serdar Túrkimenstan atynan kóptegen halyqaralyq kezdesýlerge qatysqan. Túrkimenstan prezidentiniń jalǵyz ulynyń saiasi mansabynyń tez ósýin táýelsiz baqylaýshylar 63 jastaǵy Gýrbangýly Berdimuhamedov bilikti tapsyratyn muragerin daiyndap jatyr dep túsindiredi.
9 shildede bolǵan úkimet otyrysy kezinde prezident elindegi eń bedeldi adamdardyń biri Shamýhammed Dýrdylyevti premer-ministrdiń orynbasary qyzmetinen alyp, "Ashǵabad-siti" qurylys jobasynyń jetekshisi etip taǵaiyndady. Sonymen birge Ortalyq banktiń tóraǵasy Merdan Annadýrdyev te qyzmetinen alyndy.
