Túrkimen-aýǵan shekarasyndaǵy ahýal ýshyqqan tusta Túrkimenstan biligi el arasynda patriotizm týraly nasihat júrgize bastap, shekaraǵa qosymsha áskeri kúsh tartyp jatyr.
Mary jáne Lebap oblystarynda bilik jergilikti halyqpen kezdesip, otandy súiý týraly dáris oqyp jatyr, dep habarlaidy Azattyq.
"Bizde soǵys joq, beibit ómir keship jatyrmyz, biraq soǵys bola qalsa, túrkimen halqy otany úshin kúresýge daiyn" dep aitylyp jatyr bul kezdesýlerde.
Úgit-nasihat jumystary Aýǵanstanda "Taliban" qozǵalysy kúsh alyp, shekaraǵa jaqyn aýdandardy basyp alyp jatqan tusta júrgizilip otyr.
Túrkimenstannyń memlekettik basylymdary aýǵan shekarasyndaǵy jaǵdaidyń ýshyqqany týraly habarlap jatqan joq.
Al halyq arasyndaǵy kezdesýlerdi ulttyq qaýipsizdik ministrliginiń qyzmetkerleri júrgizip jatyr.
Bilik sondai-aq shekaraǵa jaqyn Serhetabad qalasyna (burynǵy Kýshka) áskeriler men dárigerler jiberip, shekaradaǵy qaýipsizdikti kúsheitýge tyrysyp otyr.
Azatlyq tilshisi Túrkimenstannyń memlekettik shekara qyzmetindegi senimdi derekkózge siltei otyryp, aýǵan azamattarynyń tálipterden bas saýǵalap túrkimen aýmaǵyna ótip jatqanyn, biraq shekarashylardyń olardy keri qaitaryp jatqanyn aitady.
"Shekarany kúsheitý jumystarynyń júrip jatqanyna birneshe ai boldy. Shekarany kesip, túrkimen aýmaǵyna ótip jatqandar keri qaitarylyp jatyr. Maǵan shekaraǵa qosymsha áskeri kúsh pen medqyzmetkerler tartylyp jatqanyn aitty. Sondai-aq Serhetabadqa politseilerdi de jiberip jatyr. Eger kimde-kim jumysynda qatelik jiberse, ony 22 kúnge Serhetabadqa joldaidy. Osy jaǵdaidan soń kei politseiler jumystan shyqqysy keledi, biraq olardy jibermei otyr" deidi derekkóz.
Onyń sózinshe, shekaraǵa medqyzmetkerlerdi 15-20 kúnge jiberip jatyr. Tipti shekara aýmaǵyna jiberiletin medqyzmetkerlerdiń tizimi de jasalǵan.
Senimdi derekkózden alynǵan taǵy bir aqparatqa qaraǵanda, túrkimen-aýǵan shekarasyna Mary-1 jáne Mary-2 áskeri bólimderinen qosymsha kúshter jiberilip jatyr. Olardyń ishinde áskeri ofitserler, tikushaqtar men ushaqtar bar.
