Álemniń IT-astanasy San-Frantsisko qalasynda Túrki memleketteriniń birlesken Tehnologiialyq úiin ashý josparlanyp otyr. Bul týraly tsifrlyq damý, innovatsiialar jáne aeroǵarysh ónerkásibi ministri Baǵdat Mýsin málimdedi, dep habarlaidy Sputnik Qazaqstan.
Ministr mundai bastamany Bakýde túrki memleketteriniń IT-tehnologiialarǵa jaýapty ministrleriniń kezdesýinde usyndy.
Sonymen qatar Túrki memleketteriniń VIII sammiti kezinde Qazaqstan prezidenti Qasym-Jomart Toqaev uiymǵa múshe memleketterde innovatsiialar men startaptardy damytý úshin qolaily jaǵdai jasaý qajet ekendigin atap ótken bolatyn. Memleket basshysy túrki elderine ortaq zamanaýi innovatsiialyq tehnoparkter ortalyǵyn qurýdy usyndy.
Biraz másele talqylandy, sonyń ishinde zamanaýi infraqurylymdar, kommýnikatsiianyń qoljetimdiligi men sapasy, halyqaralyq yntymaqtastyqty keńeitý týraly aityldy.
"Túrkistan qalasynda Túrki elderiniń zamanaýi innovatsiialyq tehnoparkteriniń ortalyǵyn qurý týraly sheshim qabyldadyq. Túrki aimaǵynyń startaperlerine ornalasýǵa (qonaq úi, hostel) nemese Kaliforniiada qajetti bailanys kózderin tabýǵa kómektesetin birneshe qyzmetkeri bar "IT-haýs" ashylsa jaqsy bolar edi. Osy oraida men álemniń IT-astanasy San-Frantsisko qalasynda Túrki memleketteriniń birlesken Tehnologiialyq úiiniń jobasyn usyndym", - dep jazdy Mýsin áleýmettik jelide.
Sondai-aq ministr túrki memleketteri uiymynyń ókilderin "Digital Bridge Forum 2022"-ǵa shaqyrý boiynsha josparyn ortaǵa saldy.
