Búgin Halyqaralyq Túrki akademiiasy Ankarada ashylǵan «Túrki álemi: Tonykók saiabaǵy» aýmaǵyna Bilge Tonykók jazba eskertkishiniń kóshirmesin ornatty, dep habarlaidy "Ult aqparat" halyqaralyq uiymnyń saityna silteme jasap.
Tarihi mańyzy zor eskertkishtiń resmi ashylý saltanatyna Túrkiia Uly Ulttyq Májilisiniń tóraǵasy Mustafa Shentop, Halyqaralyq Túrki akademiiasynyń prezidenti Darhan Qydyráli, TÚRKSOI uiymynyń bas hatshysy Dúisen Qaseiinov, Ankara qalasy Altyndaǵ aýdanynyń meri Asym Baljy, sonymen qatar birqatar halyqaralyq uiym basshylary, Túrkiianyń belgili memleket jáne qoǵam qairatkerleri qatysty.
Túrkiia astanasynyń ortalyq aýdanynda ornalasqan saiabaq aýmaǵyna Mońǵoliiadaǵy Orhon ózeniniń boiyndaǵy VIII ǵasyrǵa jatatyn Tonykók jazba eskertkishiniń Halyqaralyq Túrki akademiiasy ázirlegen dálme-dál kóshirmesi qoiyldy.
Osylaisha Halyqaralyq Túrki akademiiasy men Altyndaǵ aýdanynyń meriiasy «Túrik tili jylyna» jáne IýNESKO aiasynda atap ótilgen Tonykók eskertkishiniń 1 300 jyldyq mereitoiyna arnalǵan mańyzdy sharaǵa uiytqy boldy.
Eskertkishtiń saltanatty ashylý rásimine qatysyp, sóz sóilegen Túrki akademiiasynyń prezidenti Darhan Qydyráli: «Ótken jyl Tonykók eskertkishiniń 1 300 jyldyq mereitoiyna orai Túrki áleminiń ortaq uiymy Halyqaralyq túrki akademiiasynyń bastamasymen «Bilge Tonykók jyly» dep jariialanǵan bolatyn. Tonykók jyly aiasynda IýNESKO-men birlese otyryp uiymdastyrǵan kóptegen is-sharalar endi. Osy baiandy bastama «Túrki álemi: Tonykók saiabaǵynyń» ashylýymen maǵynaly jalǵasyn tapty deýge bolady. Atalǵan bastamanyń Túrkiia Respýblikasynyń Prezidenti Rejep Taiyp Erdoǵan myrzanyń qaýlysymen jariialanǵan «Túrik tili jylyna» tuspa-tus kelýi de airyqsha mańyzdy. Tonykók eskertkishin Ankara qalasynda ornatý jobasyna qoldaý kórsetken Altyndaǵ aýdanynyń meri Asym Baljy myrzaǵa jáne ashylý saltanatyna arnaiy kelip qatysqan Túrkiia Ulttyq Májilisiniń tóraǵasy Mustafa Shentop myrzaǵa shyn júrekten alǵysymdy bildiremin. Endi ankaralyqtar Ótúkenge barmai-aq abyz Tonykók eskertkishin óz qalasynda kóre alady», – dep atap ótti.
