Almaty politsiiasy QR Sport jáne týrizm akademiiasynyń prezidenti Qairat Zakirianovtyń kabinetinde túsken sýretti tekserip jatyr, dep habarlaidy "Ult aqparat".
Áleýmettik jelide taralǵan sýrette kabinette qar barysynyń, ilbistiń, taǵy basqa janýarlardyń terileri anyq kórinedi. Bul sýretti Instagram jelisinde kásibi boksshy Janqosh Turarov jariialaǵan. Keiin jazba óshirildi.
Qyzyl kitapqa engen janýarlar terisiniń sýreti kópshiliktiń narazylyǵyn týdyrdy.
Qazir bul derekke bailanysty QR Ekologiia, geologiia jáne tabiǵi resýrstar ministrligi men Almaty politsiiasy tekserýdi bastady.
QR Ekologiia ministrligi osy máselege bailanysty túsinik berdi.
«Bizdiń mindetimiz – Qyzyl kitapqa engen janýarlardy turmystyq maqsatta qoldaný emes, kerisinshe olardy qorǵaý, olardyń popýliatsiiasyn saqtap qalý. Bul sýrette qar barysy, ilbis, arystannyń chýchelosy túsip qalǵan. Sýrettegi qar barysynyń terisine qatysty Orman sharýashylyǵy jáne janýarlar álemi komitetiniń Almaty oblystyq territorialdyq inspektsiiasy quqyq qorǵaý organdaryna shaǵymdanyp, tiisti shara qoldanatyn bolady. Bul máseleni baqylaýǵa alyp, azamattardyń nazarynda ustaityn bolamyz. Qar barysy Qazaqstannyń Qyzyl kitabyna engen. Ony aýlaýǵa qatań tyiym salynǵan», - dedi ministrliktiń baspasóz hatshysy Samal Ibraeva.
Onyń aitýynsha, territoriialyq inspektsiia bul sýretterdi zerttep, 2021 jyly 20 qańtarda № 03-10/86 hatpen Politsiia departamentine joldaǵan.
Joiylyp ketý aldynda turǵan sirek kezdesetin janýarlardy, olardyń bólshekterin, derivattaryn zańsyz paidalaný QR QK 339-babymen retteledi. Politsiia óz kezeginde sýrettegi terilerdiń qar barysyna tiesili ekenin anyqtaidy.
Tekserý qorytyndysyna sáikes QR zańnamasyna orai jaza qoldanylatyn bolady.
