Oral qalasynyń Kóktem shaǵyn aýdanynda «Nurly jer» baǵdarlamasy boiynsha salynǵan kóp páterli bes úi turǵyndary úsh aidan beri gazy joq páterlerde turyp jatyr. Gaz qyzmeti ókilderi gazdy turǵyndar úilerge túgel qonystanǵannan keiin qosýǵa ýáde etedi. Bilik jaǵdaiǵa qatysty ázirshe kommentarii bergen joq.
100 páterli bes úi Oral - Saratov tas joly boiynda - qala shetindegi Kóktem jańa shaǵyn aýdanynda Móńkeuly men Qambar batyr kósheleri qiylysynda salynǵan. Memlekettik qyzmetshiler men «Nurly jer» turǵyn úi qurylysy baǵdarlamasy boiynsha kezekte turǵandar jalǵa berilgen páterlerdi «Qazaqstan ipotekalyq kompaniiasynan» («QIK») alǵan. Memlekettik ipoteka páterdi jalǵa alý aqysyn merziminen erte jabý nemese satyp alý quqyǵymen 20 jyl boiy ai saiyn tólep turý shartymen berilgen.
QÝANYSh TÚŃILÝGE ULASQAN
Janna Myrzabekova men kúieýi baspana kezeginde bes jyldan kóp turǵan. Ipotekalyq nesie alý múmkindigi týǵan kezde kishkentai eki balasy bar otbasy biyl aqpannyń aiaǵynda jańa páterge dereý kóship alǵan. Biraq Myrzabekovterdiń qýanyshy kópke barmai túńiliske ainalǵan. Úide úsh aidan beri gaz joq.
- Eden sýyq, terezeden jel gýleidi. Qyzym jii tumaýratyp qalady, - deidi Janna.
Áieldiń sózinshe, «plomba» qoiyp, gazdy qostyrý úshin úi turǵyndarynyń kóbi bes myń teńgeden ótkizgen, biraq úige áli kúnge deiin gaz qospaǵan. Otbasy birneshe ai boiy tamaqty elektr peshke pisirip otyr. Aidyń sońynda elektr qýaty úshin tólemge qyrýar aqshanyń esebi keledi.
Álgi bes úige qyzmet kórsetetin «Taza aýdan» klining kompaniiasy basshysy Nurjan Aimaǵambetovtiń Azattyqqa habarlaýynsha, aqsha tólengeni jaily túbirtekterdi 20 podezdiń ekeýi ǵana tolyq tapsyrǵan.
- Budan bólek, syrttaǵy gaz qubyryn tartqan merdiger kompaniia - «Baltemen» JShS «Kommýnaldyq qyzmetterdiń esep aiyrysý ortalyǵymen» tehnikalyq qyzmet kórsetý týraly kelisim-shartqa otyrmaǵan, - deidi kompaniia basshysy.
Aimaǵambetovtiń dereginshe, turǵyndardyń jartysynan kóbi kiltterin alǵanymen, páterlerde turmaidy.
ÁKIMDIK ÚNDEMEIDI
«Kommýnaldyq qyzmetterdiń esep aiyrysý ortalyǵy» kompaniiasy direktory mindetin atqarýshy Erlan Ahmetov kóp qabatty úilerdegi tehnika qaýipsizdigi talaptaryna siltep, «úige turǵyndardyń 80 paiyzdan kóbi qonystanǵan kezde ǵana gazdy qosýǵa bolady» deidi.
- Bul talap jazataiym oqiǵalarǵa jol bermeý úshin qajet. Áýeli páterge kirip, qubyrlarda aqaý bar-joǵyn tekserip almai gazdy qosa almaimyz. Sondyqtan álgi úilerge gaz qospai otyrmyz, - deidi Ahmetov.
Buǵan qosa, «Kommýnaldyq qyzmetterdiń esep aiyrysý ortalyǵy» basshysynyń aitýynsha, kompaniia mamandary gazdy syrtqy jáne ishki gaz qubyrlary paidalanýǵa berilgennen keiin ǵana qosady. «Baltemen» kompaniiasynyń Ergen esimdi (aty-jónin tolyq ataýdan bas tartty) ókili telefon arqyly Azattyqqa:
- Bizden talap etilgen nárseniń bárin ótkizip berdik. Qalǵanyn qurylys bóliminen surańyzdar, - dedi.
Oral qurylys bólimi bastyǵy Marat Moldashevtan kommentarii alý múmkin bolmady. Sheneýniktiń qabyldaý bólmesi qyzmetkerleri jýrnalistiń kommentarii jaily ótinishin basshylyqqa jetkizýge ýáde etken, biraq olar sol kúii habarlaspady.
Budan bólek, biylǵy mamyrdyń 11-inde «Qazaqstan ipoteka kompaniiasy» «halyqtyń arasynda baǵdarlama bedelin túsirýge jol bermeý maqsatynda» gazdy qostyrýǵa yqpal etýin surap, Oral qalasy ákimi Nariman Tóreǵalievtiń atyna hat joldaǵan. Qala ákimdiginiń baspasóz qyzmeti ázirshe kommentarii bermedi.
Móńkeuly kóshesindegi úilerdiń biri – 89- úi turǵyndary jaǵdaiǵa aralasýdy surap, Batys Qazaqstan oblysy ákimi Altai Kólginovtiń atyna ujymdyq hat joldaǵan.
Sanat Oryn Áli, Azattyq
