«Otbasy bank» aktsionerlik qoǵamy ortalyq filialynyń direktory Jansultan Matai turǵyn úi jaldaý sýbsidiiasyn alý týraly ótinish qalai rásimdeletinin túsindirdi, dep habarlaidy QazAqparat.
«Habar» telearnasyndaǵy «Búgin» baǵdarlamasynda «Otbasy bank» ókili qazirgi meje boiynsha baspana jaldaý shyǵynyn sýbsidiialaý týraly ótinishter mamyr aiynda qabyldana bastaýy múmkin ekenin aitty.
«Qazaqstan boiynsha 70 myń adam turǵyn úi jaldaý sýbsidiiasyna qol jetkize alady dep jatyrmyz ǵoi. Osy 70 myń adamnyń bárine «Otbasy bank» ofisterine kelýdiń qajet joq. Bul jumystyń bárin onlain formatta. Úiden shyqpai otyryp berýge múmkindik bar», - dedi ol.
Aitýynsha, atalǵan qadamdardyń bárin retteitin ereje áli bekitilmegen. Biraq jasalyp jatqan nusqasynda osylai aitylǵan.
«Birinshiden, osy baǵdarlamaǵa qatysý týraly ótinim beredi. Ekinshiden, óziniń jeke basynyń derbes aqparatyn «Otbasy bank» tarapynan óńdeýge ruqsat beredi. Úshinshiden, óziniń zeinetaqy qoryndaǵy qarajatyna bank atynan suranys jasaýǵa ruqsat beredi. Nesie alǵan kezde de sondai protsedýradan ótedi. Osy ruqsattardy bergennen keiin «Otbasy bank» 6 ministrliktiń 16 derekqoryndaǵy málimetterdi zerdelep, 10 kúnniń ishinde ótinishke jaýap beredi. Qazir integratsiia protsesi pysyqtalyp jatyr. Bul jumystardyń bári tek onlain formatta júredi», - dedi Jansultan Matai.
