Turǵyn úi jaldaý aqysyn sýbsidiialaý erejesi mamyr aiyna qarai daiyn bolýy qajet. QR Úkimet basshysy Álihan Smaiylov Úkimet otyrysynda tiisti vedomstvoǵa osyndai tapsyrma júktedi, habarlaidy QazAqparat.
Otyrys kezinde Álihan Smaiylov Indýstriia jáne infraqurylymdyq damý ministrliginiń eldegi turǵyn úi saiasaty jónindegi usynystaryn qoldaitynyn aitty.
«Sonymen birge myna máselelerdi de atap ótý qajet dep sanaimyn.
Birinshi. Turǵyn úi saiasatynyń jańa tásilderin engizýdiń mańyzdylyǵyn eskerip, Indýstriia ministrligi tiisti zań jobasynyń Parlamentte depýtattarmen sapaly ári jedel pysyqtalýyn qamtamasyz etýi qajet.
Ekinshi. Indýstriia ministrligi men «Báiterek» holdingi arendany sýbsidiialaý mehanizmin engizý boiynsha barlyq uiymdastyrý máseleleri men rásimderdi aiaqtap, osy jyldyń 1-shi mamyryna deiin naqty iske asyrýǵa kirisýige tiis», - dedi Premer-Ministr.
Onyń aitýynsha, osy baǵyttaǵy rásimderdiń ashyqtyǵyn qamtamasyz etý úshin jaýapty ministrlik qurylys salasyn tsifrlyq tehnologiialar arqyly retteýge arnalǵan zań jobasyn 1-shi sáýirge deiin Úkimetke engizýi qajet.
«Sondai-aq qurylys maýsymyn ýaqtyly bastaýdyń mańyzy zor. Óńir ákimderi kún jylynǵan soń qurylys jumystaryn barynsha tezdetý úshin erte bastan jer ýchaskelerin bólýdi, jobalyq qujattardy ázirleýdi, qajetti infraqurylymdy júrgizýdi qamtamasyz etýi tiis», - degen Úkimet basshysy bul jumystardyń bárin baqylaýdy orynbasary Roman Skliarǵa tapsyrdy.
