Turǵyn úi naryǵynda jetekshi qurylys salýshylardyń ústemdik etýi kúsheiýde. Bul týraly Úkimet otyrysynda QR Básekelestikti qorǵaý jáne damytý agenttiginiń tóraǵasy Serik Jumanǵarin aitty, dep habarlaidy QazAqparat.
«Agenttiktiń 2021 jyly turǵyn úi naryǵynda júrgizgen taldaýy kórsetkendei, kóptegen óńirlerde turǵyn úidi ótkizý naryǵynyń shoǵyrlanýy joǵary. Almaty, Soltústik Qazaqstan, Jambyl, Qyzylorda, Mańǵystaý oblystarynda - shoǵyrlanýy ortasha. Almaty qalasynda – I jáne II sanatty turǵyn úidi ótkizý naryǵynyń shoǵyrlanýy joǵary, al, III jáne IV sanatty - ortasha. Nur-Sultan qalasynda úlestik qurylys naryǵynyń shoǵyrlanýy joǵary. Onda BI Group holdinginiń bir ǵana qurylys salýshysynyń úlesi 60 paiyzdan asady», - dedi agenttik tóraǵasy.
Bul rette ol jyl saiyn turǵyn úi qurylysy kóleminiń ulǵaiýy 10 paiyzdan astam bolyp otyrǵanyn aitady.
«Alaida, naryqty damytýdyń ornyna, onyń oiynshylarynyń sany artyp, jetekshi qurylys salýshylardyń ústemdik etýi kúsheiýde. Nátijesinde, sońǵy bes jylda bastapqy turǵyn úi baǵalarynyń jyldyq indeksiniń ósýi 1,3-ten 16,6 paiyzdy qurady. Bastapqy turǵyn úi baǵasynyń ósý serpininiń 12 eseden astam ulǵaiýy qurylys naryǵynyń monopoliialanýynyń negizgi nátijesi sanalady», - dedi Serik Jumanǵarin.
