Qazaqstanda Turǵyn úi qurylysynyń biryńǵai operatory qurylady. Oǵan «Báiterek» Ulttyq basqarýshy holdingi» AQ-ǵa enshiles 3 kompaniia enedi, dep habarlaidy "Ult aqparat".
9 maýsym kúni Memleket basshysy Qasym-Jomart Toqaev turǵyn úi baǵdarlamalarynyń operatorlaryn qysqartý jónindegi Zańǵa qol qoidy. Oǵan sáikes elimizde Turǵyn úi qurylysynyń biryńǵai operatory qurylady. Zań biylǵy 1 shildeden bastap qoldanysqa enedi.
Qazirgi tańda, «Báiterek» holdinginiń quramynda Qazaqstannyń turǵyn úi qurylysy salasyn damytýmen ainalysyp jatqan 4 enshiles uiym bar:
- «Qazaqstannyń turǵyn úi qurylys jinaq banki» AQ (QTQJB);
- «Qazaqstan ipotekalyq kompaniiasy» AQ (QIK);
- «Báiterek development» AQ (BD);
- «Turǵyn úi qurylysyna kepildik berý qory» AQ (TQKQ).
Sondai-aq, «Damý» kásipkerlikti damytý qory» AQ turǵyn úi qurylysymen ainalysatyn kásipkerlerdiń kreditteri boiynsha sýbsidiia beredi.
Zańǵa sáikes, «Báiterek» holdinginiń 3 enshiles uiymy («Turǵyn úi qurylys jinaq bankin» qospaǵanda) Turǵyn úi qurylysynyń biryńǵai operatoryna biriktiriledi. «Damý» qorynyń qurylys salýshylardy sýbsidiialaý fýnktsiiasy da Biryńǵai operatorǵa beriledi. Bul rette, «Turǵyn úi qurylys jinaq banki eldegi»turǵyn úi-qurylys jinaq júiesin damytýshy jalǵyz bank retinde halyqqa baspanaǵa jeńildikpen nesie berý fýnktsiiasyn jalǵastyra beredi.
Bastapqy kezeńde Biryńǵai operator mynadai fýnktsiialardy júzege asyrady:
- ákimdikterde kezekte turǵandar men «Turǵyn úi qurylys jinaq bankiniń» salymshylary úshin qoljetimdi turǵyn úi qurylysyn qarjylandyrý;
- úleskerlik qurylystyń aiaqtalýyna kepildik berý;
- jeke qurylys salýshylardyń kreditterin sýbsidiialaý;
- menshikti investitsiialyq jobalardy iske asyrý jáne qarjylyq qyzmettiń ózge de túrlerin kórsetý.
«Qazirgi ýaqytta, Indýstriia jáne infraqurylymdyq damý ministrligimen birge normativtik-quqyqtyq bazany jańa Zańǵa sáikes beiimdeý jumystaryn júrgizýdemiz. Atalǵan jumys kelesi toqsanda aiaqtalmaqshy. Al qyrkúiek aiynyń sońyna deiin qalǵan korporativtik rásimder aiaqtalyp, qujattar ádilet organdaryna jiberiledi.
Biryńǵai operatordy qurý úshin respýblikalyq biýdjetten nemese «Báiterek» holdinginen qosymsha qarajat bólý qajet emes. Qyzmettiń turǵyn úi bóligin ońtailandyrý ákimshilik shyǵystardy keminde 40%-ǵa astam qysqartýǵa múmkindik beredi. Enshiles kompaniialardyń shtat sany da azaiady. Al basqarý apparaty 3 esedei qysqarady. Alaida, elimizdiń ár óńirinde Biryńǵai operatordyń ókilderi bolady», - dedi «Báiterek» ulttyq basqarýshy holdingi» AQ Basqarma tóraǵasynyń orynbasary Ánýar Omarqojaev.
Sondai-aq málim etilgendei, biylǵy jyldyń sońyna deiin «Turǵyn úi qurylys jinaq bankiniń» bazasynda «Otbasy banki» qurylady. Ol turǵyn úidi esepke alýdy, kezekke qoiýdy jáne ony bólýdi bir ortalyqtan júzege asyrady. Ákimdikter baspana kezegi boiynsha tizimdi «Otbasy bankine» berip otyrady.
