Sybailas jemqorlyqqa qarsy is-qimyl agenttiginiń Preventsiia departamentiniń basshysy Anar Jarova memleketten beriletin turǵyn úi kezegi boiynsha kezdesken zańbuzýshylyqtardy atady, dep habarlaidy QazAqparat.
«Turǵyn úi berý boiynsha kezekte turǵandar tizimin jasaýǵa bailanysty máseleler jetkilikti deńgeide rettelmei jatyr. Kezek boiynsha ótinishter elektrondy túrde «E-gov» portaly nemese HQKO arqyly qabyldanady. Osyǵan qaramastan ákimdikter ózderi kezekti Excel nemese Word kesteleri nysanynda qolmen júrgizedi. Bul kezekti manipýliatsiialaý múmkindikterinde, naqty tulǵalarǵa artyqshylyq berip, ózge de sybailas jemqorlyq táýekelderine sózsiz jaǵdai jasaidy. Sonymen qatar, bul jaǵdai bir adamǵa birneshe ótinish jasaýǵa múmkindik beredi. Iaǵni, bir adam birneshe ret kezekke tura alady, bul kútken adamdardyń sanyn jasandy túrde arttyrady», - dedi Anar Jarova.
Onyń aitýynsha, ákimdikter kommýnaldyq turǵyn úi qorynan páter alýǵa nemese jeke turǵyn úi qoryna jalǵa berýdiń sanat boiynsha jeke tizimin júrgizedi. Zańǵa sáikes, myna sanattaǵy adamdarǵa úi berilýi kerek. Olar: ekinshi dúniejúzilik soǵysynyń qatysýshylary men múgedekteri, jetim balalar, ata-ana qamqorlyǵynsyz qalǵan balalar, «Altyn alqa», «Kúmis alqa» alqalarymen marapattalǵan nemese buryn «Batyr ana» ataǵyn alǵan, sondai-aq I jáne II dárejeli «Ana dańqy» ordenderimen marapattalǵan kópbalaly analar, kópbalaly otbasylar, halyqtyń áleýmettik osal toptary jáne memlekettik qyzmetshiler, biýdjettik uiymdar qyzmetkerleri, áskeri qyzmetshiler, ǵaryshkerlikke kandidattar, ǵaryshkerler, arnaýly memlekettik organdar qyzmetkerleri jáne memlekettik sailanbaly qyzmet atqaratyn adamdar, jalǵyz turǵyn úii apattyq jaǵdaida dep tanylǵan azamattar.
«Bir kezekten ekinshisine aýystyrý rásimi zańnamalyq túrde rettelmegen. Bul ártúrli tájiribeni týyndatyp, sybailas jemqorlyq kórinisterine jaǵdai jasaidy. Sondai-aq, kezekten alynǵan azamattardy habardar etý, kezekti qalpyna keltirý rásimderi reglamenttelmegen. Sońǵy rásim jasyryn memlekettik qyzmettiń barlyq belgilerine ie jáne Memlekettik qyzmetter tiziliminde normativtik bekitýdi talap etedi. «Turǵyn úi qatynastary týraly» zań talaptaryna sáikes, jergilikti atqarýshy organdar merzimdi baspasóz basylymdarynda turǵyn úige muqtaj, turǵyn úi alǵan adamdardyń tizimin, olardyń kezektiligin kórsete otyryp, bólek esepke alý tizimderin jariialaýǵa mindetti», - dedi ol.
Alaida taldaý júrgizý kezinde bul talaptardy barlyǵy oryndamaǵany anyqtalǵan.
«Mysalǵa, Oral ákimdigi joǵaryda atalǵan tizimderdi baspa basylymdarynda jariialamaǵan, al Petropavl ákimdigi jariialaǵan tizimde kezekke qoiylǵan kúnin kórsetpegen. Uqsas jaǵdai barlyq jerde oryn alǵan», - dedi Anar Jarova.
