Ishki ister ministri Qazaqstan Prezidentine dári-dármekti zańsyz satýdyń jolyn kesý jáne karantin sharalaryn buzý faktileri týraly baiandady, dep habarlaidy "Ult aqparat" Aqordaǵa silteme jasap.
Qasym-Jomart Toqaev koronavirýs indetiniń taralýyna qarsy kúres máseleleri jóninde ótken selektorlyq keńeste quqyq qorǵaý, densaýlyq saqtaý jáne jergilikti atqarýshy organdar dárilik zattar men meditsinalyq qural-jabdyqtardy satý boiynsha quqyq buzýshylyqtardy anyqtaýda jáne onyń jolyn kesýde turaqty túrde vedomstvoaralyq jumys júrgizý qajettigin basa aitty.
Keńeste Ishki ister ministri E.Turǵymbaev esep berip, IIM densaýlyq saqtaý jáne jergilikti atqarýshy organdarmen birlesip,18 myńnan astam reid júrgizgeni týraly baiandady.
Kórsetilgen kezeńde barlyǵy 4000-nan astam karantindi buzýshylar anyqtalyp, shara qoldanyldy. Atap aitqanda mundai jaǵdai Almaty qalasynda, Aqmola, Túrkistan, Almaty jáne Jambyl oblystarynda kóp tirkeldi.
Dárilik zattar men meditsinalyq maqsattaǵy buiymdardy zańsyz satýdyń jolyn kesý boiynsha (5 shildeden bastap) ishki ister organdary zańsyz ainalymnan 65 myńnan actam qorap dárilik preparattardy, jarty million meditsinalyq maska men 36 myń meditsinalyq buiymdy tárkilegen. Olar qymbat baǵada satylǵan.
Sondai-aq ishki ister organdary dárilik zattardy zańsyz satýdyń 348 faktisiniń jolyn kesti. Politsiiaǵa 284 adam jetkizildi, onyń 138-si meditsina salasynyń qyzmetkerleri. Dári-dármektiń kóp kólemi Nur-Sultan, Almaty, Shymkent, Qaraǵandy jáne Atyraý qalalarynda alyndy.
Alynǵan meditsinalyq preparattar aýmaqtyq densaýlyq saqtaý organdaryna beriledi.
Sonymen qatar E.Turǵymbaev ishki ister organdary júrgizip jatqan qoǵamdyq tártipti saqtaý jáne qoldanystaǵy shekteý sharalaryn qamtamasyz etý jumystary týraly baiandady. Bul mindetterdi oryndaý úshin kúndelikti 13 000 politsei, Ulttyq ulannyń áskeri qyzmetshileri jáne 1000 erikti jumys isteýde. 4 oblysta 2 sanitariialyq jáne 9 blokbeket qoiyldy. 241 juqtyrý oshaǵy men 366 karantindik nysan qorshaýǵa alyndy.
Keńes qorytyndysy boiynsha, Prezident ishki ister organdary bul baǵyttaǵy jumysty jalǵastyratynyn, al, kináliler zańnamaǵa sáikes jazalanatynyn atap ótti.
Bul tapsyrmanyń iske asyrylýyn baqylaý QR Prezidenti Ákimshiliginiń úilestirýmen Qaýipsizdik Keńesiniń Apparatyna júkteldi.
