Qazaqstannyń ishki ister ministri Erlan Turǵymbaev Aqmola oblysy boiynsha politsiia departamentiniń basshysyn qyzmetinen shettetti, dep habarlaidy vedomstvonyń baspasóz qyzmeti.
Ishki ister ministrligi bul jaǵdaidyń tergeýmen bailanysty ekenin málimdedi.
"Departament basshysynyń orynbasary Asan Sádýov pen qarjylyq qamtamasyz etý basqarmasynyń bastyǵy Sáýle Jumalina sybailas jemqorlyq jasady degen kúdikke ilinip, sotqa deiingi tergeý jumystarynyń júrgizilýine bailanysty politsiia departamentiniń basshysy, general-maior Berik Bilálov atqaryp otyrǵan laýazymynan bosatý týraly raport berdi", - delingen habarlamada.
Ministrdiń buiryǵymen Aqmola oblysy boiynsha politsiia departamenti basshysy mindetin atqarýshy bolyp kriminaldy politsiia departamentin basqaratyn politsiia general-maiory, Armanbek Baimýrzin taǵaiyndaldy.
Óńirde joǵary shendi politsiia basshylarynyń ustalǵany jóninde aqparat osy jyldyń 4 qazanynda taraǵan. Olar senip tapsyrylǵan múlikti iemdendi nemese talan-tarajǵa saldy degen kúdikke ilingen. Keiin eki politsiia polkovnigi qamaýǵa alyndy. Vedomstvo ókilderi Aqmola oblysy boiynsha politsiia departamentiniń orynbasary ishki ister organdarynan shyǵarylǵanyn atap ótti. Búginde tártip saqshylary oqiǵanyń mán-jaiyn anyqtap jatyr.
