قازاقستاننىڭ ٸشكٸ ٸستەر مينيسترٸ ەرلان تۇرعىمباەۆ اقمولا وبلىسى بويىنشا پوليتسييا دەپارتامەنتٸنٸڭ باسشىسىن قىزمەتٸنەن شەتتەتتٸ, دەپ حابارلايدى ۆەدومستۆونىڭ باسپاسٶز قىزمەتٸ.
ٸشكٸ ٸستەر مينيسترلٸگٸ بۇل جاعدايدىڭ تەرگەۋمەن بايلانىستى ەكەنٸن مەلٸمدەدٸ.
"دەپارتامەنت باسشىسىنىڭ ورىنباسارى اسان سەدۋوۆ پەن قارجىلىق قامتاماسىز ەتۋ باسقارماسىنىڭ باستىعى سەۋلە جۇمالينا سىبايلاس جەمقورلىق جاسادى دەگەن كٷدٸككە ٸلٸنٸپ, سوتقا دەيٸنگٸ تەرگەۋ جۇمىستارىنىڭ جٷرگٸزٸلۋٸنە بايلانىستى پوليتسييا دەپارتامەنتٸنٸڭ باسشىسى, گەنەرال-مايور بەرٸك بٸلەلوۆ اتقارىپ وتىرعان لاۋازىمىنان بوساتۋ تۋرالى راپورت بەردٸ", - دەلٸنگەن حابارلامادا.
مينيستردٸڭ بۇيرىعىمەن اقمولا وبلىسى بويىنشا پوليتسييا دەپارتامەنتٸ باسشىسى مٸندەتٸن اتقارۋشى بولىپ كريمينالدى پوليتسييا دەپارتامەنتٸن باسقاراتىن پوليتسييا گەنەرال-مايورى, ارمانبەك بايمۋرزين تاعايىندالدى.
ٶڭٸردە جوعارى شەندٸ پوليتسييا باسشىلارىنىڭ ۇستالعانى جٶنٸندە اقپارات وسى جىلدىڭ 4 قازانىندا تاراعان. ولار سەنٸپ تاپسىرىلعان مٷلٸكتٸ يەمدەندٸ نەمەسە تالان-تاراجعا سالدى دەگەن كٷدٸككە ٸلٸنگەن. كەيٸن ەكٸ پوليتسييا پولكوۆنيگٸ قاماۋعا الىندى. ۆەدومستۆو ٶكٸلدەرٸ اقمولا وبلىسى بويىنشا پوليتسييا دەپارتامەنتٸنٸڭ ورىنباسارى ٸشكٸ ٸستەر ورگاندارىنان شىعارىلعانىن اتاپ ٶتتٸ. بٷگٸندە تەرتٸپ ساقشىلارى وقيعانىڭ مەن-جايىن انىقتاپ جاتىر.
